ശാസ്ത്രോത്സവം ശുചിയായി നടത്താന്‍ ശുചിത്വ സേന
കോഴിക്കോട്: ഇത്തവണത്തെ ശാസ്ത്രോത്സവം ശുചിയായി നടത്താന്‍ ശുചിത്വ സേന സജ്ജമായി. ജില്ലാ ശുചിത്വ മിഷന്‍റെ കീഴില്‍ ഗ്രീന്‍ പ്രോട്ടോകോള്‍ കമ്മിറ്റിക്കാണ് ശുചിത്വ സേനയുടെ ചുമതല.
ഒരു സ്കൂളില്‍ പത്തു കുട്ടികള്‍ എന്ന കണക്കില്‍ എട്ട് സ്കൂളുകളിലായി 80 കുട്ടികളാണ് ശുചിത്വ സേവനത്തിനുള്ളത്. എന്‍സിസി, എസ്പിസി അംഗങ്ങളാണിവര്‍. മേളകള്‍ നടക്കുമ്പോള്‍ എപ്പോഴും ഉണ്ടാകുന്ന പ്രശ്നമാണ് മാലിന്യം. ഇതിനൊരു പരിഹാരം കണ്ട് മാതൃകാപരമായി ശാസ്ത്രോത്സവം നടത്തുകയാണ് ശുചിത്വ സേനയുടെ ലക്ഷ്യം. ഇത്തവണത്തെ ശാസ്ത്രോത്സവത്തില്‍ പ്ലാസ്റ്റിക് നിരോധനവും നടപ്പിലാക്കുന്നുണ്ട്.
മാലിന്യം ശേഖരിക്കാന്‍ ഓല മെടഞ്ഞുണ്ടാക്കിയ കുട്ടയാണ് ഉപയോഗിക്കുക. കൂടാതെ എല്ലാ വേദിയിലും വേസ്റ്റ് ബിന്നുകള്‍ സ്ഥാപിച്ചിട്ടുണ്ട്. കേരള ഉറുദു ടീച്ചേഴ്സ് അസോസിയേഷനാണ് ശുചിത്വസേനയിലെ വിദ്യാര്‍ഥികള്‍ക്ക് വേണ്ട മാര്‍ഗ നിര്‍ദേശങ്ങള്‍ നല്‍കുന്നത്.
