കേരള ഗാന്ധി കെ. കേളപ്പൻ്റെ പൂര്‍ണകായ പ്രതിമ ഗവര്‍ണര്‍ അനാച്ഛാദനം ചെയ്തു
പയ്യോളി: കേരള ഗാന്ധി കെ. കേളപ്പൻ്റെ സ്മരണക്കായി ജന്മദേശമായ തുറയൂരിലെ കൊയപ്പള്ളി തറവാട്ടുമുറ്റത്ത് തയാറാക്കിയ പൂര്‍ണകായ പ്രതിമ കേരള ഗവര്‍ണര്‍ ആരിഫ് മുഹമ്മദ് ഖാന്‍ അനാച്ഛാദനം ചെയ്തു. ചൊവ്വാഴ്ച വൈകീട്ട് അഞ്ചരക്ക് തുറയൂരിലെ മുണ്ടോളിത്താഴെ റോഡിലുള്ള കൊയപ്പള്ളി തറവാട്ടിലെ വീട്ടുമുറ്റത്ത് പ്രത്യേകം തയാറാക്കിയ വേദിയിലായിരുന്നു പരിപാടി.
കോവിഡ് നിയന്ത്രണങ്ങള്‍ പാലിച്ചുകൊണ്ട് നടന്ന പരിപാടിയില്‍ കേളപ്പജിയുടെ കുടുംബാംഗങ്ങളെയും സംഘാടകരെയും മാധ്യമ പ്രവര്‍ത്തകരെയും മാത്രമാണ് സദസ്സിലേക്ക് പ്രവേശിപ്പിച്ചത്. കെ. മുരളീധരന്‍ എം.പി.അധ്യക്ഷത വഹിച്ചു. തുറയൂര്‍ ഗ്രാമപഞ്ചായത്ത് പ്രസിഡന്‍റ് സി.കെ.ഗിരീഷ് സംസാരിച്ചു. ഗവര്‍ണറുടെ ഫോട്ടോ ആലേഖനം ചെയ്ത ഛായാചിത്രം സംഘാടകര്‍ ഉപഹാരമായി നല്‍കി. പ്രതിമ തയാറാക്കിയ ശില്‍പി ചിത്രനെ ഗവര്‍ണര്‍ ഉപഹാരം നല്‍കി ആദരിച്ചു. വിജയന്‍ കൈനടത്ത് സ്വാഗതവും ബാബു പുതുക്കുടി നന്ദിയും പറഞ്ഞു.
കേളപ്പജിയുടെ അമ്പതാം ചരമവാര്‍ഷിക ദിനത്തോടനുബന്ധിച്ച്‌ കൊയപ്പള്ളി തറവാട് പരിപാലന സമിതി ട്രസ്റ്റിൻ്റെ മേല്‍നോട്ടത്തിലാണ് പ്രതിമ സ്ഥാപിച്ചത്. ഏഴര അടി ഉയരത്തിലാണ് ഖദര്‍മുണ്ടും ജുബ്ബയും വേഷ്ടിയും കറുത്ത കണ്ണടയും ധരിച്ച്‌ ജീവന്‍ തുടിക്കുന്ന പൂര്‍ണകായ പ്രതിമ തറവാട് പടിക്കല്‍ തയാറാക്കിയത്. ശില്‍പി ചിത്രൻ്റെ പയ്യന്നൂരിലെ പണിപ്പുരയിലാണ് കളിമണ്ണിലും പ്ലാസ്റ്റര്‍ ഓഫ് പാരിസിലും തീര്‍ത്ത പ്രതിമ ഫൈബറില്‍ വാര്‍ത്തെടുത്തത്. വെങ്കല നിറത്തില്‍ അവസാന മിനുക്കുപണികള്‍ മാത്രമാണ് തുറയൂരില്‍ എത്തിച്ച്‌ പൂര്‍ത്തീകരിച്ചത്.
