കുട്ടികളുടെ അശ്ലീല ദൃശ്യങ്ങള്‍ പ്രചരിപ്പിച്ച അമേരിക്കന്‍ പൗരനെ പോലീസ് അറസ്റ്റ് ചെയ്തു
ഹൈദരാബാദ്: ഇന്റര്‍നെറ്റില്‍ കുട്ടികളുടെ അശ്ലീല ദൃശ്യങ്ങള്‍ പ്രചരിപ്പിച്ചതിന് അമേരിക്കന്‍ പൗരനെ ഹൈദരാബാദില്‍ പോലീസ് അറസ്റ്റ് ചെയ്തു. ന്യൂജേഴ്സി സ്വദേശിയായ 42 കാരന്‍ ജെയിംസ് കിര്‍ക്ക് ജോണ്‍സിനെയാണ് അറസ്റ്റ് ചെയ്തത്. ഇയാള്‍ 2012 മുതല്‍ ഹൈദരാബാദിലെ ഒരു നിയമ സ്ഥാപനത്തില്‍ ബഹുഭാഷ വിദഗ്ദ്ധനായി ജോലി ചെയ്ത് വരികയാണ്.
തെലുങ്കാനാ പോലീസിന്റെ സൈബര്‍ ക്രൈം വിഭാഗത്തിന് ഇന്റര്‍പോള്‍ നല്‍കിയ വിവരത്തിന്റെ അടിസ്ഥാനത്തിലാണ് ജെയിംസിനെ അറസ്റ്റ് ചെയ്തത്. കുട്ടികളുടെ അശ്ലീല ദൃശ്യങ്ങള്‍ വ്യാപകമായി ഇന്റര്‍നെറ്റില്‍ പ്രചരിപ്പിക്കുന്ന ഒരു ഐപി അഡ്രസ്സാണ് ഇന്റര്‍പോള്‍ പോലീസിന് നല്‍കിയത്. ഈ ഐപി അഡ്രസ് ജോണ്‍സിന്റെ മധാപുരിലുള്ള വീട്ടിലെ കമ്ബ്യൂട്ടറില്‍ നിന്നാണെന്ന് പോലീസ് കണ്ടെത്തുകയായിരുന്നു.
ഈ ദൃശ്യങ്ങള്‍ ഇന്റര്‍നെറ്റില്‍ പ്രചരിപ്പിക്കുന്നതിനായി ഇരുപത്തിനാലോളം ട്വിറ്റര്‍ അക്കൗണ്ടകളടക്കം ഇയാള്‍ക്കുണ്ടായിരുന്നതായി പോലീസ് കണ്ടെത്തിയിട്ടുണ്ട്. ഐടി ആക്‌ട് പ്രകാരമാണ് ഇയാള്‍ക്കെതിരെ കേസ് രജിസ്റ്റര്‍ ചെയ്തിട്ടുള്ളത്. പോലീസ് കൂടുതല്‍ അന്വേഷണം നടത്തി വരികയാണ്.
