വയനാട് സുല്ത്താന് ബത്തേരിയില് വന് ലഹരി വേട്ട: 64 ഗ്രാം എംഡിഎംഎയുമായി യുവാവ് കസ്റ്റഡിയിൽ
.
കല്പ്പറ്റ: വയനാട് സുല്ത്താന് ബത്തേരിയില് വന് ലഹരി വേട്ട. 64 ഗ്രാം എംഡിഎംഎയുമായി യുവാവ് പിടിയില്. മലദ്വാരത്തില് ഒളിപ്പിച്ച നിലയില് എംഡിഎംഎ കടത്താന് ശ്രമിച്ച കോഴിക്കോട് പരപ്പന്പൊയില് സ്വദേശി സനീഷ് കുമാറാണ് അറസ്റ്റിലായത്. ജില്ലാ പൊലീസ് മേധാവിയുടെ ലഹരി വിരുദ്ധ സ്ക്വാഡും ബത്തേരി പൊലീസും ചേര്ന്നാണ് ഇയാളെ പിടികൂടിയത്. വയനാട് ജില്ലാ പൊലീസ് മേധാവിക്കും ലഹരി വിരുദ്ധ സ്കോഡിനും ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു പരിശോധന.
കര്ണാടകയില് നിന്ന് സുല്ത്താന് ബത്തേരിയിലേക്ക് വരികയായിരുന്ന കെഎസ്ആര്ടിസി ബസിലെ യാത്രക്കാരനായിരുന്നു സനീഷ്. കോട്ടക്കുന്ന് വെച്ച് നടത്തിയ പരിശോധനയിലാണ് ഇയാളെ കസ്റ്റഡിയിലെടുത്തത്. പിന്നീട് ചോദ്യം ചെയ്യലിലാണ് ശരീരത്തില് ഒളിപ്പിച്ച നിലയില് ലഹരി കണ്ടെത്തിയത്. ആശുപത്രിയില് നടത്തിയ സ്കാനിംഗില് വയറ്റിനുള്ളിൽ ലഹരി പാക്കറ്റ് കണ്ടെത്തി. വിദഗ്ധ പരിശോധനയ്ക്കായി ഇയാളെ മാനന്തവാടി മെഡിക്കല് കോളേജിലേക്ക് മാറ്റിയിരിക്കുകയാണ്.
