പട്ടിണിക്കിട്ട വൃദ്ധമാതാവിനെ സംരക്ഷിക്കാന്‍ മകന് താക്കീതു നല്‍കി വനിതാ കമ്മീഷന്‍
കൊല്ലം പള്ളിമേല്‍ കിഴക്കേക്കരയില്‍ വൃദ്ധയെ ഭക്ഷണവും മരുന്നും ഇല്ലാതെ തനിച്ചാക്കി പട്ടിണിക്കിട്ട മകന് കര്‍ശന താക്കീതു നല്‍കി വനിതാ കമ്മീഷന്‍. വൃദ്ധയുടെ മതിയായ സംരക്ഷണവും മറ്റു കാര്യങ്ങളും കൃത്യമായി നിര്‍വഹിച്ചു അക്കാര്യം കമ്മീഷനെ അറിയിക്കണമെന്നും ഇക്കാര്യത്തില്‍ വീഴ്ച സംഭവിച്ചാല്‍ മകനും മകള്‍ക്കുമെതിരെ കര്‍ശന നടപടികള്‍ സ്വീകരിക്കുമെന്നും വനിതാ കമ്മീഷന്‍ അംഗം ഡോ. ഷാഹിദ കമല്‍ അറിയിച്ചു.
മകനും മരുമകളും ഈ നിര്‍ദ്ദേശങ്ങള്‍ പാലിച്ചില്ലെങ്കില്‍ വൃദ്ധയുടെ സംരക്ഷണം ഉറപ്പാക്കി സര്‍ക്കാര്‍ സ്ഥാപനത്തിലേക്ക് മാറ്റുന്നതിനായി കമ്മീഷന്‍ ഇടപെടുമെന്നും ഡോ. ഷാഹിദ കമല്‍ അറിയിച്ചു.
വൃദ്ധയെ മകനും മരുമകളും തനിച്ചാക്കി പട്ടിണിക്കിടുന്നുവെന്ന നാട്ടുകാരുടെ പരാതിയെ തുടര്‍ന്ന് വനിതാ കമ്മീഷന്‍ അംഗം ഡോ. ഷാഹിദ കമല്‍ നേരിട്ട് കൊല്ലാതെ വീട്ടില്‍ അന്വേഷണത്തിനായി എത്തിയത് . ഈ സമയത്തു വീട്ടില്‍ മരുമകള്‍ ഉണ്ടായിരുന്നു. മകനുമായി ഫോണില്‍ സംസാരിച്ചു. വൃദ്ധക്ക് നാലു മക്കളും ഭര്‍ത്താവുമാണുണ്ടായിരുന്നത്. ഭര്‍ത്താവും മറ്റു മൂന്ന് മക്കളും മരണപ്പെട്ടതിനാല്‍ ആശ്രയത്തിനു കൊല്ലത്തെ വീട്ടിലുള്ള ഏകമകനല്ലാതെ മറ്റാരുമില്ലാത്ത സാഹചര്യമാണ്. എന്നാല്‍ ഇവര്‍ വൃദ്ധമാതാവിനെ ഒരു മുറിയില്‍ തനിച്ചാക്കി ഭക്ഷണവും വെള്ളവും നല്‍കാതെ പീഡിപ്പിക്കുകയാണെന്ന് നാട്ടുകാര്‍ പരാതിപ്പെട്ടതിനെ തുടര്‍ന്ന് കമ്മീഷന്‍ നേരിട്ട് പരിശോധന നടത്തുകയായിരുന്നു.
