ചിക്കൻ കഴിക്കുമ്പോൾ എന്തൊക്കെ ശ്രദ്ധിക്കണം? എല്ലാ ഭാഗങ്ങളും കഴിക്കാമോ?
.
നമ്മുടെ ഭക്ഷണക്രമത്തിൽ ഒഴിവാക്കാൻ പറ്റാത്ത ഒന്നാണല്ലേ ചിക്കൻ. പ്രോട്ടീൻ ധാരാളം അടങ്ങിയ ഭക്ഷണമായതു കൊണ്ടു തന്നെ ഫിറ്റ്നസും ആരോഗ്യവും ശ്രദ്ധിക്കുന്നവർക്കും ഏറെ പ്രിയപ്പെട്ടതാണ് ചിക്കൻ വിഭവം. എന്നാൽ ചിക്കൻ കഴിക്കുമ്പോൾ നമ്മൾ ശ്രദ്ധിക്കേണ്ട കുറച്ചു കാര്യങ്ങൾ ഉണ്ട്. ചിക്കന്റെ ഏതൊക്കെ ഭാഗങ്ങൾ കഴിക്കാം. ഏതൊക്കെ ഭാഗങ്ങൾ ഒഴിവാക്കണം?
എങ്ങനെ പാകം ചെയ്യുന്നതാണ് ഗുണകരം. ഇത്തരം കാര്യങ്ങൾ നമുക്കൊന്ന് നോക്കാം. ചിക്കൻ എങ്ങനെ കഴിക്കുന്നു എന്നുള്ളത് അനുസരിച്ചിരിക്കും അതിന്റെ ആരോഗ്യ ഗുണവും. ചിക്കൻ എപ്പോഴും അതിന്റെ സ്കിൻ ഒഴിവാക്കി കഴിക്കുന്നതാണ് നല്ലത്. ചിക്കന്റെ സ്കിൻ ഒട്ടും കഴിക്കാൻ പാടില്ല എന്നല്ല, കുറയ്ക്കുന്നതാണ് നല്ലത് എന്നാണ്. തൊലിയിൽ ധാരാളം കൊഴുപ്പ് അടങ്ങിയിരിക്കുന്നത് കൊണ്ടാണിത്. പ്രത്യേകിച്ച് ശരീരഭാരം നിയന്ത്രിക്കാൻ ആഗ്രഹിക്കുന്നവരാണെങ്കിൽ തൊലി നിർബന്ധമായും കളയണം.
അതുപോലെ ചിക്കൻ ലിവർ കഴിക്കുന്നത് ആരോഗ്യത്തിന് നല്ലതാണ്. വിറ്റാമിൻ ബി12, വിറ്റാമിൻ എ, ഇരുമ്പ് എന്നിവ അടങ്ങിയതു കൊണ്ടാണിത് ആരോഗ്യത്തിന് ഗുണകരം എന്നു പറയുന്നത്. എങ്കിലും വലിയ തോതിൽ ലിവർ കഴിക്കുന്നത് ആരോഗ്യത്തിന് ദോഷം ചെയ്യും. ലിവറിൽ ധാരാളം വിറ്റമിൻ എ ഉള്ളതുകൊണ്ടാണിത്. ഗർഭിണികൾ ഡോക്ടറുടെ നിർദേശപ്രകാരം മാത്രമേ കഴിക്കാവൂ. ദിവസവും ലിവർ കഴിക്കുന്നതും എല്ലാവരും ഒഴിവാക്കണം. ചിക്കൻ നല്ലപോലെ വേവിച്ചു കഴിക്കാനും ശ്രദ്ധിക്കണം. കൂടാതെ, പൊരിച്ചും വറുത്തും ചിക്കൻ കഴിക്കുന്നതും ഒഴിവാക്കണം.
