ഹൃദയത്തെ ഹെൽത്തിയാക്കണോ? ഈ നിർദേശങ്ങൾ പാലിച്ചാൽ മതി
.
ഹൃദയാരോഗ്യം സംരക്ഷിക്കാൻ മാർഗനിർദേശങ്ങളുമായി അമേരിക്കൻ ഹാർട്ട് അസോസിയേഷൻ. ഹൃദയസംബന്ധമായ അസുഖങ്ങൾ തടയുന്നതിൽ ഭക്ഷണരീതി വലിയൊരു പങ്കുവഹിക്കുന്നു. ഗർഭാവസ്ഥ മുതൽ തന്നെ നല്ല ഭക്ഷണശീലങ്ങൾ തുടങ്ങേണ്ടത് അത്യാവശ്യമാണെന്ന് ഈ മാർഗ്ഗനിർദ്ദേശങ്ങൾ വ്യക്തമാക്കുന്നു.
ധാന്യങ്ങൾ പൂർണ്ണരൂപത്തിൽ കഴിക്കുന്നത് ഹൃദ്രോഗ സാധ്യത കുറയ്ക്കാൻ സഹായിക്കുന്നു. ഗോതമ്പ്, ഓട്സ്, ബ്രൗൺ റൈസ്, ക്വിനോവ, ബാർലി, റാഗി തുടങ്ങിയവ ഭക്ഷണത്തിൽ ഉൾപ്പെടുത്തുന്നത് ഹൃദയാരോഗ്യം മെച്ചപ്പെടുത്തും. പയർവർഗ്ഗങ്ങൾ, പരിപ്പ്, നട്സ് എന്നിവ കൂടുതൽ കഴിക്കുക. മത്സ്യം കഴിക്കുന്നത് ഒമേഗ-3 ഫാറ്റി ആസിഡുകൾ നൽകി ഹൃദയാരോഗ്യം മെച്ചപ്പെടുത്തുന്നു. കൊഴുപ്പ് കുറഞ്ഞ പാൽ ഉൽപ്പന്നങ്ങൾ തിരഞ്ഞെടുക്കുക.
റെഡ് മീറ്റ് കഴിക്കുകയാണെങ്കിൽ, കൊഴുപ്പ് കുറഞ്ഞ ഭാഗങ്ങൾ മാത്രം തിരഞ്ഞെടുക്കുക. മൃഗങ്ങളിൽ നിന്നുള്ള കൊഴുപ്പുകൾക്കും ട്രോപ്പിക്കൽ ഓയിലുകൾക്കും പകരം സോയാബീൻ, കനോല, ഒലിവ് ഓയിൽ തുടങ്ങിയവ ഉപയോഗിക്കുക. ഇത് ശരീരത്തിലെ ചീത്ത കൊളസ്ട്രോൾ കുറയ്ക്കാൻ സഹായിക്കും.
അമിതമായി സംസ്കരിച്ച ഭക്ഷണങ്ങളിൽ ഉപ്പും പഞ്ചസാരയും രാസവസ്തുക്കളും കൂടുതലായിരിക്കും. ഇവ പൊണ്ണത്തടി, പ്രമേഹം, ഹൃദ്രോഗം എന്നിവയ്ക്ക് കാരണമാകുന്നു. അതിനാൽ, കഴിയുന്നതും പ്രകൃതിദത്തമായ ഭക്ഷണം മാത്രം കഴിക്കുക. ഭക്ഷണത്തിൽ ചേർക്കുന്ന പഞ്ചസാരയുടെ അളവ് കുറയ്ക്കേണ്ടത് അത്യാവശ്യമാണ്. അമിതമായ പഞ്ചസാര ഉപയോഗം ഹൃദ്രോഗം, പ്രമേഹം, അമിതവണ്ണം എന്നിവയ്ക്കുള്ള സാധ്യത വർദ്ധിപ്പിക്കുന്നു.
ഉപ്പിന്റെ അളവ് പരിമിതപ്പെടുത്തുക. കൂടുതൽ ഉപ്പ് കഴിക്കുന്നത് രക്തസമ്മർദ്ദം വർദ്ധിപ്പിക്കുന്നു. ഇത് ഹൃദയസ്തംഭനത്തിലേക്ക് നയിക്കാം. പൊട്ടാസ്യം അടങ്ങിയ ഭക്ഷണങ്ങൾ കഴിക്കുന്നതും ഉപ്പ് കുറയ്ക്കുന്നതും രക്തസമ്മർദ്ദം നിയന്ത്രിക്കാൻ സഹായിക്കും. മദ്യപാനം ഹൃദയാരോഗ്യത്തിന് നല്ലതാണെന്ന ധാരണ തെറ്റാണെന്ന് പുതിയ ഗവേഷണങ്ങൾ സൂചിപ്പിക്കുന്നു. മദ്യപാനം രക്തസമ്മർദ്ദം വർദ്ധിപ്പിക്കുകയും ക്യാൻസർ പോലുള്ള മറ്റ് രോഗങ്ങൾക്ക് കാരണമാവുകയും ചെയ്യും. അതിനാൽ, ഹൃദയാരോഗ്യത്തിനായി മദ്യപാനം പൂർണ്ണമായും ഒഴിവാക്കുന്നതാണ് ഉചിതം.ഈ പോഷകാഹാര രീതികൾ പിന്തുടരുന്നത് ഹൃദയാരോഗ്യം മെച്ചപ്പെടുത്തുന്നതിനൊപ്പം ശരീരത്തിന് ആവശ്യമായ വിറ്റാമിനുകളും ധാതുക്കളും ലഭിക്കാനും സഹായിക്കും.
