ഡാര്‍ജിലിങ് മഴക്കെടുതി; മരണം 23 ആയി
പശ്ചിമ ബംഗാളിലെ ഡാർജിലിങ്ങിൽ കനത്ത മഴയിലും വ്യാപകമായ മണ്ണിടിച്ചിലിലും മരണം 23 ആയി. മരിച്ചതില്‍ 7 പേര്‍ കുട്ടികളാണ്. ദുരന്തത്തിൽ നിരവധി വീടുകൾ ഒലിച്ചുപോയി, റോഡുകൾ തകർന്നു, ഗ്രാമങ്ങൾ ഒറ്റപ്പെട്ടു, വ്യാപകമായ നാശനഷ്ടങ്ങൾക്കിടയിൽ നൂറുകണക്കിന് വിനോദ സഞ്ചാരികൾ ഒറ്റപ്പെടുകയും ചെയ്തു.
ദേശീയ ദുരന്ത നിവാരണ സേനയും (എൻ‌ഡി‌ആർ‌എഫ്) പശ്ചിമ ബംഗാളിലെ ഡാർജിലിംഗ്, ജൽപായ്ഗുരി ജില്ലാ ഭരണകൂടങ്ങളും ശേഖരിച്ച റിപ്പോർട്ടുകൾ പ്രകാരം, സർസാലി, ജസ്ബിർഗാവ്, മിരിക് ബസ്തി, ധർ ഗാവ് (മെച്ചി), മിരിക് തടാക പ്രദേശം, ജൽപായ്ഗുരി ജില്ലയിലെ നാഗരകത പ്രദേശം എന്നിവിടങ്ങളിൽ നിരവധി പേർ കൊല്ലപ്പെട്ടതായാണ് റിപ്പോർട്ട്.
സ്ഥിതിഗതികൾ വഷളായതോടെ, പശ്ചിമ ബംഗാൾ മുഖ്യമന്ത്രി മമത ബാനർജി സംസ്ഥാന സെക്രട്ടേറിയറ്റ് നബന്നയിൽ ഉന്നതതല യോഗം വിളിച്ചുചേർത്തു. ഇന്ന് മമത വടക്കൻ ബംഗാൾ സന്ദർശിക്കും. 2015-ൽ ഡാർജിലിംഗിൽ 40-ഓളം പേരുടെ മരണത്തിന് കാരണമായ മണ്ണിടിച്ചിലിന് ശേഷമുള്ള ഏറ്റവും ഭീകരമായ മണ്ണിടിച്ചിൽ എന്ന് ഉദ്യോഗസ്ഥർ വിശേഷിപ്പിച്ച ഈ മണ്ണിടിച്ചിൽ, വൻ നാശനഷ്ടങ്ങളാണ് അവശേഷിപ്പിച്ചത്.
