വിദ്യാർത്ഥികൾക്ക് ഇടവേള ഭക്ഷണം വിതരണം ചെയ്തു
കൊയിലാണ്ടി നഗരസഭ ‘ദിശ’ സമഗ്ര വിദ്യാഭ്യാസ പദ്ധതിയിലുൾപ്പെടുത്തി നഗരസഭയിലെ ഒന്നുമുതൽ ഏഴ് വരെ ക്ലാസുകളിലുള്ള വിദ്യാർത്ഥികൾക്ക് ഇടവേള ഭക്ഷണം വിതരണത്തിൻ്റെ ഉദ്ഘാടനം കൊയിലാണ്ടി നഗരസഭ ചെയർപേഴ്സൺ സുധ കിഴക്കെപ്പാട്ട് നിർവ്വഹിച്ചു. വൈസ് ചെയർമാൻ അഡ്വ. കെ സത്യൻ അധ്യക്ഷത വഹിച്ചു. ഇംപ്ലിമെൻ്റിങ് ഓഫീസർ കെ. ലൈജു പദ്ധതി വിശദീകണം നടത്തി.
വികസന സ്റ്റാൻ്റിംഗ് കമ്മറ്റി ചെയർപേഴ്സൺ കെ. എ. ഇന്ദിര, വാർഡ് കൗൺസിലർ എ. ലളിത, ഭവിത സി, സ്കൂൾ ഹെഡ്മിസ്ട്രസ് ഷജിത ടീച്ചർ എന്നിവർ ആശംസകൾ നേർന്നു. 22 സ്കൂളുകളിലായി 5000 ത്തിലധികം വിദ്യാർത്ഥികളാണ് ഈ പദ്ധതിയുടെ ഗുണഭോക്താക്കൾ. നഗരസഭയിലെ മുഴുവൻ സ്കൂളുകളിലും വാർഡുകളിലെ കൗൺസിലർമാർ ഈ പദ്ധതി ഉദ്ഘാടനം ചെയ്തു. നഗരസഭാ വിദ്യാഭ്യാസ സ്റ്റാൻ്റിങ് കമ്മറ്റി ചെയർപേഴ്സൺ നിജില പറവക്കൊടി സ്വാഗതവും പി.ടി.എ പ്രസിഡണ്ട് എ സജീവ് കുമാർ നന്ദിയും പറഞ്ഞു.
