ആഴക്കടലില്‍പ്പെട്ട പോത്തിനെ സാഹസികമായി മത്സ്യ തൊഴിലാളികള്‍ രക്ഷിച്ചു
കോഴിക്കോട്: രാത്രി ദിശ തെറ്റി ആഴക്കടലില്‍പ്പെട്ട പോത്തിനെ സാഹസികമായി മത്സ്യ തൊഴിലാളികള്‍ രക്ഷിച്ചു. വ്യാഴാഴ്ച പുലര്‍ച്ച രണ്ടോടെ നൈനാംവളപ്പ് തീരത്ത് നിന്ന് എട്ട് കിലോമീറ്റര്‍ അകലെ പുറംകടലിലേക്ക് അവശനിലയില്‍ നീന്തുന്ന അവസ്ഥയിലാണ് തൊഴിലാളികള്‍ പോത്തിനെ കണ്ടത്. കോതി അഴിമുഖത്ത് നിന്ന് മീന്‍ പിടിക്കാന്‍ പുറപ്പെട്ട അറഫ, സാല റിസ എന്നീ രണ്ട് ഫൈബര്‍ വള്ളത്തിലെ തൊഴിലാളികളായ എ.ടി. റാസി, എ.ടി. ഫിറോസ്, എ.ടി. സക്കീര്‍, എ.ടി. ദില്‍ഷാദ് എന്നിവര്‍ ചേര്‍ന്ന് മണിക്കൂറുകള്‍ പണിപ്പെട്ടാണ് രക്ഷിച്ചത്. കടലില്‍ അസാധാരണ ശബ്ദംകേട്ട് നോക്കുമ്പോഴാണ് പോത്തിനെ കണ്ടത്. ശ്വാസം കിട്ടാതെ ചാവുമെന്ന നിലയിലായപ്പോള്‍ മീന്‍പിടിത്തം നിര്‍ത്തി രക്ഷാ പ്രവര്‍ത്തനത്തിനിറങ്ങുകയായിരുന്നു.
അവശനായ പോത്ത് കടലില്‍ മുങ്ങാതിരിക്കാന്‍ രണ്ട് കാനുകള്‍ തൊഴിലാളികളിലൊരാള്‍ ജീവന്‍ പണയം വെച്ച്‌ പോത്തിന്‍റെ ശരീരത്തില്‍ കെട്ടുകയായിരുന്നു. പതുക്കെ നീന്തിച്ചുകൊണ്ട് വന്ന് കരക്ക് എത്തിച്ചു. കോതി അഴിമുഖത്ത് എത്തുമ്ബോള്‍ രാവിലെ എട്ട് മണി കഴിഞ്ഞിരുന്നു. വൈകുന്നേരം വിവരമറിഞ്ഞ് ഉടമ വന്ന് പോത്തിനെ കൊണ്ടുപോയി. കുറ്റിച്ചിറയിലെ വീട്ടില്‍ പോറ്റുന്ന പോത്ത് കഴിഞ്ഞ ദിവസം ഉച്ചക്ക് കയര്‍ അഴിഞ്ഞ് കടപ്പുറത്തേക്ക് ഓടിപ്പോവുകയായിരുന്നു. കടലില്‍ ഇവ ഇറങ്ങുന്നത് അപൂര്‍വമല്ലെങ്കിലും സാധാരണ ഇവക്ക് ദിശതെറ്റാറില്ല.
