ദിലീപ് സിനിമ ലോകത്തിനും കേരളത്തിനും അപമാനമാണ് വരുത്തിവച്ചിരിക്കുന്നതെന്ന് രമേശ് ചെന്നിത്തല
കണ്ണൂര്‍: നടി ആക്രമിക്കപ്പെട്ട കേസില്‍ അറസ്റ്റ് ചെയ്യപ്പെട്ട നടന്‍ ദിലീപ് സിനിമ ലോകത്തിനും കേരളത്തിനും അപമാനമാണ് വരുത്തിവച്ചിരിക്കുന്നതെന്ന് പ്രതിപക്ഷ നേതാവ് രമേശ് ചെന്നിത്തല. ദിലീപ് അറസ്റ്റ് ചെയ്യപ്പെട്ടതോട് കൂടി ദിലീപ് കേരള സമൂഹത്തോട് ചെയ്ത ഏറ്റവും വലിയ തെറ്റാണ് പുറത്ത് വന്നിരിക്കുന്നത്. അദ്ദേഹത്തെ പോലൊരു നടന്‍ ഒരിക്കലും ചെയ്യാന്‍ പാടില്ലാത്ത കൃത്യമാണ് ചെയ്തിരിക്കുന്നതെന്നും രമേശ് ചെന്നിത്തല കണ്ണൂരില്‍ പറഞ്ഞു.
താര സംഘടനയായ അമ്മ ഉടനെ പിരിച്ചുവിടണമെന്നും ഈ സംഘടന കൊണ്ട് ഒരു കാര്യവും ഇല്ലെന്ന് തെളിഞ്ഞിരിക്കുകയാണെന്നും അദ്ധേഹം പറഞ്ഞു. ഇന്നസെന്‍റിനും മുകേഷിനും ഗണേഷിനും തല്‍സ്ഥാനത്ത് തുടരാനുള്ള അര്‍ഹത നഷ്ടപ്പെട്ടിരിക്കുകയാണ്. കേസില്‍ ഈ മൂന്ന് ജന പ്രതിനിധികളെയുമാണ് ആദ്യം ചോദ്യം ചെയ്യേണ്ടത്. ഈയൊരു കേസ് തെളിഞ്ഞതില്‍ കേരള പോലീസിന് അഭിമാനിക്കാന്‍ സാധിക്കും.
കേരളത്തിലുള്ള എല്ലാ പ്രമാദമായ കേസുകളും തെളിയിക്കുന്നതില്‍ കേരള പോലീസ് എന്നും സാമര്‍ഥ്യം കാട്ടിയിട്ടുണ്ടെന്നും അദ്ദേഹം പ്രശംസിച്ചു. എന്നാല്‍ പള്‍സര്‍ സുനിക്കെതിരെ താന്‍ ആഭ്യന്തരമന്ത്രിയായിരുന്ന രണ്ടര വര്‍ഷക്കാലം ഏതെങ്കിലും തരത്തിലുള്ള പരാതി ലഭിച്ചതായി ഓര്‍മയില്ലെന്നും അദ്ധേഹം മാധ്യമ പ്രവര്‍ത്തകരുടെ ചോദ്യത്തിന് ഉത്തരം നല്‍കി. പള്‍സര്‍ സുനി 10 വര്‍ഷത്തോളം മുകേഷിന്‍റെ ഡ്രൈവറായിരുന്നു. അതുകൊണ്ട് പ്രതിയുടെ പശ്ചാത്തലമറിയാന്‍ മുകേഷിനെയും ചോദ്യം ചെയ്യണമെന്നും അദ്ദേഹം ആവശ്യപ്പെട്ടു.
