കുഴല്പ്പണം കടത്തല്; രണ്ട് യുവാക്കള് പിടിയില്
തൃശൂര്: തൃശൂരില്നിന്ന് മലപ്പുറത്തേക്കു കടത്തുകയായിരുന്ന കുഴല്പ്പണവുമായി രണ്ടുപേരെ വിയ്യൂര് പോലീസ് അറസ്റ്റ് ചെയ്തു. മഞ്ചേരി നെല്ലിക്കുത്ത് പാലം സ്വദേശികളായ കണ്ണംപാലി വീട്ടില് അബ്ദുള്സലാം (42), ചക്കിപ്പറന്പില് വീട്ടില് ഷെറഫുദ്ദീന് (36) എന്നിവരാണ് അറസ്റ്റിലായത്. ഇവരില്നിന്ന് 15,66,000 രൂപ പിടിച്ചെടുത്തു. ഇന്നലെ ഉച്ചയോടെയാണ് സംഭവം. വിയ്യൂര് സര്വീസ് സെന്ററിനു മുന്വശം നിര്ത്തിയിട്ട കര്ണാടക രജിസ്ട്രേഷനുള്ള കാര് പോലീസ് സംശയം തോന്നി പരിശോധിച്ചപ്പോഴാണ് ഇരുവരും കുടുങ്ങിയത്. പോലീസിനെ കണ്ട വെപ്രാളത്തില് ഇരുവരും പണം നിറച്ച അറകളുള്ള ജാക്കറ്റ് തൊട്ടടുത്തുള്ള മാലിന്യക്കൂന്പാരത്തിലേക്കു വലിച്ചെറിഞ്ഞു.
മലപ്പുറം സ്വദേശിയായ ബാബു എന്നയാള്ക്കുവേണ്ടിയാണ് പണം കടത്തുന്നതെന്നും ഇരുവരും പോലീസിനോടു പറഞ്ഞു. തൃശൂരിലുള്ള ഒരു ബിസിനസുകാരന്റേതാണ് പണം. ആദ്യമായാണ് പണം കടത്തുന്നതെന്നും ഒരാള്ക്ക് 1500 രൂപയാണ് പണം കടത്താന് നിര്ദേശിച്ചയാള് വാഗ്ദാനം ചെയ്തതെന്നും ഇരുവരും മൊഴിനല്കി. എസ്ഐ ഡി. ശ്രീജിത്തിന്റെ നേതൃത്വത്തില് അന്വേഷണമാരംഭിച്ചു. ബാബുവിനോട് വിയ്യൂര് സ്റ്റേഷനില് ഹാജരാകാന് പോലീസ് ആവശ്യപ്പെട്ടിട്ടുണ്ട്.