Q 2 ഈ വര്‍ഷം അവസാനത്തോടെ ഇന്ത്യയില്‍ പുറത്തിറക്കും
ഡല്‍ഹി: ജര്‍മന്‍ ആഡംബര വാഹന നിര്‍മാതാക്കളായ ഔഡി മിനി എസ്.യു.വി ശ്രേണിയില്‍ അവതരിപ്പിക്കുന്ന Q 2 ഈ വര്‍ഷം അവസാനത്തോടെ ഇന്ത്യയില്‍ പുറത്തിറക്കും. 2016 ജെനീവ ഓട്ടോഎക്സ്പോയിലാണ് Q 2 ആദ്യമായി കമ്ബനി അവതരിപ്പിച്ചത്. Q സീരീസില്‍ ഔഡി നിരത്തിലെത്തിക്കുന്ന ഏറ്റവും ചെറിയ വാഹനമായിരിക്കും Q 2. നിലവില്‍ Q 3, Q 5, Q 7 എന്നീ എസ്.യു.വി മോഡലുകളാണ് Q സീരിസില്‍ ഇന്ത്യന്‍ വിപണിയിലുള്ളത്.
എസ്.യു.വി മാര്‍ക്കറ്റില്‍ രാജ്യത്തെ മികച്ച സാധ്യത കണക്കിലെടുത്താണ് ആഡംബര ശ്രേണിയില്‍ വില കുറഞ്ഞ മോഡലുമായി കമ്ബനി എത്തുന്നത്. 25 ലക്ഷമാണ് ഏകദേശ വിപണി വില. ഡല്‍ഹിയിലെ ഡീസല്‍ വാഹനങ്ങളുടെ നിരോധനം കണക്കിലെടുത്ത് പെട്രോള്‍ പതിപ്പായിരിക്കും ആദ്യ പുറത്തിറക്കുക.
പെട്രോള്‍ ലോഞ്ചിനുശേഷം 1.6 ലിറ്റര്‍, 2.0 ലിറ്റര്‍ ടിഡിഐ ഡീസല്‍ എഞ്ചിന്‍ മോഡലുകളും കമ്ബനി രാജ്യത്തെത്തിക്കാനാണ് സാധ്യത. മികച്ച സാങ്കേതിക വിദ്യയില്‍ ഒരുക്കിയ ഡ്രൈവ് അസിസ്റ്റ് സിസ്റ്റമാണ് പുതിയ മോഡലില്‍ ഉള്‍പ്പെടുത്തിയിരിക്കുന്നത്.
