സീചെം ട്രോഫിയില്‍ കേരളത്തിന് കിരീടം

.

സീനിയര്‍ വനിതകള്‍ക്കായുള്ള സീചെം ട്രോഫിയില്‍ കേരളം ചാമ്പ്യന്മാര്‍. ഫൈനലില്‍ ഹിമാചല്‍ പ്രദേശിനെ 48 റണ്‍സിന് തോല്‍പ്പിച്ചാണ് കേരളം കപ്പുയര്‍ത്തിയത്. ആദ്യം ബാറ്റ് ചെയ്ത കേരളം 20 ഓവറില്‍ ഏഴ് വിക്കറ്റ് നഷ്ടത്തില്‍ 146 റണ്‍സെടുത്തു. മറുപടി ബാറ്റിങ്ങിനിറങ്ങിയ ഹിമാചല്‍പ്രദേശ് 18.3 ഓവറില്‍ 98 റണ്‍സിന് ഓള്‍ ഔട്ടാവുകയായിരുന്നു.

തകര്‍പ്പന്‍ ബൗളിങ്ങിലൂടെ കേരളത്തിന് വിജയമൊരുക്കിയ നിയ നസ്‌നീനാണ് പ്ലെയര്‍ ഓഫ് ദി മാച്ച്. ടോസ് നഷ്ടപ്പെട്ട് ആദ്യം ബാറ്റ് ചെയ്ത കേരളത്തിന് ഓപ്പണര്‍മാരുടെ ഭേദപ്പെട്ട പ്രകടനമാണ് മികച്ച സ്‌കോര്‍ സമ്മാനിച്ചത്. കിരണ്‍ നവ്ഗിരെ 34-ഉം ടി. ഷാനി 30-ഉം റണ്‍സെടുത്തു. 15 പന്തുകളില്‍ 24 റണ്‍സെടുത്ത നജ്‌ല സി.എം.സി.യുടെയും ആറ് പന്തുകളില്‍ 15 റണ്‍സെടുത്ത നിയ നസ്‌നീന്റെയും പ്രകടനവും ശ്രദ്ധേയമായി.

ഹിമാചല്‍പ്രദേശിനു വേണ്ടി നീന ചൗധരി നാലും യമുന വി. റാണ രണ്ടും വിക്കറ്റുകള്‍ വീഴ്ത്തി. മറുപടി ബാറ്റിങ്ങിനിറങ്ങിയ ഹിമാചല്‍പ്രദേശ് ബാറ്റിങ് നിരയില്‍ 40 റണ്‍സെടുത്ത ഹര്‍ലീന്‍ ഡിയോളും 30 റണ്‍സെടുത്ത ഹിമാന്‍ഷി മേത്തയും മാത്രമാണ് മികച്ച പ്രകടനം കാഴ്ചവെച്ചത്. മറ്റ് ബാറ്റര്‍മാര്‍ രണ്ടക്കം കാണാതെ പുറത്തായി. നാല് ഓവറില്‍ രണ്ട് മെയ്ഡനടക്കം എട്ട് റണ്‍സ് മാത്രം വിട്ടുകൊടുത്ത് നാല് വിക്കറ്റ് വീഴ്ത്തിയ നിയ നസ്‌നീനാണ് ഹിമാചല്‍ ബാറ്റിങ് നിരയെ തകര്‍ത്തത്.

മൃദുല വി. എസ്, ടി. ഷാനി എന്നിവര്‍ രണ്ട് വിക്കറ്റ് വീതവും സജന സജീവന്‍ ഒരു വിക്കറ്റും വീഴ്ത്തി. ടൂര്‍ണ്ണമെന്റില്‍ ഒരേയൊരു മത്സരത്തില്‍ മാത്രമായിരുന്നു കേരളം തോല്‍വി വഴങ്ങിയത്. നേരത്തെ സീചെം ട്രോഫിയുടെ അണ്ടര്‍ 19 വിഭാഗത്തിലും കേരളം കിരീടം നേടിയിരുന്നു.