കൊവിഡിൻ്റെ പുതിയ വകഭേദം ബിഎഫ് 7 ഇന്ത്യയിൽ സ്ഥിരീകരിച്ചു. ജാഗ്രത കടുപ്പിച്ച് കേരളം.
രാജ്യത്ത് കൊവിഡിൻ്റെ പുതിയ വകഭേദം ബിഎഫ് 7 സ്ഥിരീകരിച്ച സാഹചര്യത്തില് ജാഗ്രത കടുപ്പിച്ച് കേരളം. പത്ത് മാസത്തെ ഇടവേളയ്ക്ക് ശേഷമാണ് സംസ്ഥാനം വീണ്ടും കൊവിഡിനെ ജാഗ്രതയോടെ കാണുന്നത്. സംസ്ഥാനത്ത് എല്ലാ ജില്ലകള്ക്കും ജാഗ്രതാ നിര്ദേശം നല്കി.
പുതിയ കൊവിഡ് വകഭേദത്തിന് വ്യാപന ശേഷി കൂടുതലായതിനാല് അതീവ ജാഗ്രത വേണമെന്ന് ആരോഗ്യ വകുപ്പ് അറിയിച്ചു. മാസ്ക് ധരിക്കാനും നിര്ദേശമുണ്ട്. ആശങ്ക വേണ്ടെന്നും, എന്നാല് കൊവിഡ് പകരാതിരിക്കാനുള്ള മുന്കരുതല് സ്വീകരിക്കണമെന്ന് ആരോഗ്യമന്ത്രി വീണ ജോര്ജ് പറഞ്ഞു.
ഇക്കഴിഞ്ഞ ഫെബ്രുവരി മാര്ച്ച് മാസങ്ങളിലാണ് സംസ്ഥാനത്ത് കൊവിഡ് രണ്ടാം തരംഗം അതിൻ്റെ അവസാനത്തിലേക്ക് എത്തുന്നത്. അപ്പോഴും മൂന്നാം തരംഗത്തെ കുറിച്ചുള്ള മുന്നറിയിപ്പുകൾ ആരോഗ്യ വിദഗ്ദ്ധര് നല്കിയിരുന്നു.
ചൈന അടക്കമുള്ള അയല് രാജ്യങ്ങളാണ് ഇപ്പോള് കൊവിഡ് മൂന്നാം തരംഗത്തിൻ്റെ പിടിയിലുള്ളത്. വ്യാപന ശേഷി കൂടുതലുള്ള ബി എഫ് 7 വകഭേദം ഇന്ത്യയിലും റിപ്പോര്ട്ട് ചെയ്തതോടെ പ്രതിരോധ നടപടികള് ഊര്ജിതമാക്കുകയാണ് കേരളം. കേന്ദ്ര സർക്കാരിൻ്റെ നിർദേശം ലഭിക്കുന്ന മുറയ്ക്ക് വിമാനത്താവളങ്ങളിലെ കൊവിഡ് പരിശോധന ആരംഭിക്കും.