പയറ്റുവളപ്പിൽ ശ്രീദേവി ക്ഷേത്രത്തിൽ മഹാനവമി നാളിൽ നടന്ന പൊങ്കാല സമർപ്പണം ഭക്തിനിർഭരമായി
കൊയിലാണ്ടി: പയറ്റുവളപ്പിൽ ശ്രീദേവി ക്ഷേത്രത്തിൽ മഹാനവമി നാളിൽ നടത്തിയ പൊങ്കാല സമർപ്പണം ഭക്തിനിർഭരമായി. ആദ്യമായാണ് ക്ഷേത്രത്തിൽ പൊങ്കാല നടത്തുന്നത്. നവരാത്രി ആഘോഷത്തിന്റെ ഭാഗമായി ശ്രീമദ് ദേവി ഭാഗവത നവാഹ പാരായണവും ഉണ്ടായിരുന്നു. കാലത്ത് 7 മണിക്ക് ക്ഷേത്രാങ്കണത്തിൽ നിരവധി പേരാണ് ഭക്തിയോടെ പങ്കെടുത്തത്.
ക്ഷേത്രം മേൽശാന്തി കന്യാട്ടുകുളങ്ങര വിഷ്ണു ശർമ ശാന്തിയുടെ മുഖ്യ കാർമികത്വത്തിൽ നടന്ന ചടങ്ങിൽ തെരുപറമ്പിൽ കെ. പി. ഗൗരി കുട്ടികൃഷ്ണൻ ഭദ്രദീപം കൊളുത്തിയ ശേഷം മേൽശാന്തി പൊങ്കാല അടുപ്പുകളിൽ അഗ്നി പകർന്നു. ശേഷം മഹാമൃത്യുഞ്ജയ ഹോമവും നടന്നു. നാളെ വിജയദശമി ദിനത്തിൽ കാലത്ത് വിദ്യാരംഭവും വാഹനപൂജയും ഉണ്ടായിരിക്കുന്നതാണ്.
