വാളയാറിൽ 23 കിലോ കഞ്ചാവുമായി രണ്ട് പേർ പിടിയിൽ

വാളയാർ: വാളയാർ ചെക്ക് പോസ്റ്റിൽ എക്സൈസ് നടത്തിയ വാഹനപരിശോധനയിൽ 23 കിലോ കഞ്ചാവുമായി രണ്ട് പേർ പിടിയിൽ. ഒഡീഷ കാന്തമൽ സ്വദേശികളായ ആനന്ദ്മാലിക് (26), കേദാർ മാലിക് (27) എന്നിവരെയാണ് പിടികൂടിയത്. കോയമ്പത്തൂർ – കായംകുളം കെഎസ്ആർടിസി ബസിലാണ് കഞ്ചാവ് കടത്തിയത്.

പിടികൂടിയ കഞ്ചാവിന് പത്ത് ലക്ഷം വിലമതിക്കുമെന്ന് എക്സൈസ് സംഘം അറിയിച്ചു. വാളയാർ എക്സൈസ് ഇൻസ്‌പെക്ടർ എ മുരുഗദാസിന്റെ നേതൃത്വത്തിൽ എക്സൈസ് ഉദ്യോഗസ്ഥരായ ജി പ്രഭ, കെ പി രാജേഷ്, ഉണ്ണികൃഷ്ണൻ എന്നിവരടങ്ങിയ സംഘമാണ് പരിശോധന നടത്തിയത്. പ്രതികളെ കോടതിയിൽ ഹാജരാക്കി റിമാൻഡ് ചെയ്തു.