അടിപിടി കേസ്സുകളിൽ ഉൾപ്പെട്ട പ്രതിയെ KAAPA ചുമത്തി നാടുകടത്തി
കോഴിക്കോട്: അടിപിടി കേസ്സുകളിൽ ഉൾപ്പെട്ട പ്രതിയെ KAAPA ചുമത്തി നാടുകടത്തി. കോഴിക്കോട് പെരുമണ്ണ മുണ്ടുപാലം സ്വദേശി വളയം പറമ്പ് വീട്ടിൽ ഷനൂപ് ചിക്കു (42) വിനെയാണ് കാപ്പ ചുമത്തി നാടു കടത്തിയത്. കോഴിക്കോട് നഗരത്തിന്റെ പലഭാഗങ്ങളിലും സാമൂഹ്യ വിരുദ്ധ പ്രവർത്തനങ്ങളിൽ ഏർപ്പെട്ടുവരുന്ന ആളുകളുമായി കൂടിച്ചേർന്ന് സംഘശക്തിയായും, ഒറ്റയ്ക്കും കോഴിക്കോട് സിറ്റി പോലീസ് സ്റ്റേഷൻ പരിധിയിലെ നടക്കാവ്, പന്തീരങ്കാവ്, എന്നീ സ്റ്റേഷനുകളിലായി വീട്ടിൽ അതിക്രമിച്ചു കയറി മാരകായുധങ്ങൾ ഉപയോഗിച്ചും അല്ലാതെയും മരണംവരെ സംഭവിക്കാവുന്ന ദേഹോപദ്രവം ഏൽപ്പിച്ചതിനും, വഞ്ചന കുറ്റത്തിനും, ക്രിമിനൽ ഗൂഡാലോചനയ്ക്കുമായി പ്രതിക്ക് നാലോളം കേസ്സുകൾ നിലവിലുണ്ട്.
ഗുരുതര കുറ്റകൃത്യങ്ങൾ ചെയ്ത് പൊതുസമൂഹത്തിന് ഭീഷണിയാവുകയും, തുടർച്ചയായി, അടിപിടി കേസ്സുകളിലും ഉൾപ്പെട്ടുവരുന്ന പ്രതിക്കെതിരെ പന്തീരങ്കാവ് പോലീസ് സ്റ്റേഷനിൽ നിന്നും നല്ല നടപ്പിനുള്ള നടപടി സ്വീകരിക്കുന്നതിൻെറ ഭാഗമായി റിപ്പോർട്ട് തയ്യാറാക്കി കോഴിക്കോട് സബ് ഡിവിഷണൽ മജിസ്ട്രേറ്റ് കോടതിയിൽ റിപ്പോർട്ട് സമർപ്പിച്ചിരുന്നതും, പ്രസ്തുത റിപ്പോർട്ടിനെ തുടർന്ന് സബ് ഡിവിഷണൽ കോടതി ഒരു വർഷക്കാലത്തേക്കുള്ള നല്ല നടപ്പ് ജാമ്യത്തിൽ കഴിയവെ വീണ്ടും കുറ്റകൃത്യങ്ങളിൽ ഏർപ്പെട്ടതിനെ തുടർന്നാണ് പ്രതിക്കെതിരെ പന്തീരങ്കാവ് പോലീസ് KAAPA നടപടി സ്വീകരിച്ചത്.
അറിയപ്പെടുന്ന റൌഡിയായ പ്രതിക്കെതിരെ പന്തീരങ്കാവ് പോലീസ് സ്റ്റേഷൻ ഇൻസ്പെക്ടർ നൽകിയ പ്രാഥമിക റിപ്പോർട്ട് പ്രകാരം കോഴിക്കോട് സിറ്റി പോലീസ് കമ്മിഷണർ സമർപ്പിച്ച ശുപാർശയിലാണ് കണ്ണൂർ റെയ്‌ഞ്ച് ഡി.ഐ. ജി. ഒരു വർഷത്തേക്ക് നടുകടത്തൽ ഉത്തരവ് പുറപ്പെടുവിച്ചത്.
