മുന്നോട്ട് വെച്ച ആവശ്യങ്ങൾക്ക് ഉടൻ തീരുമാനമായി: നവകേരള സദസിനെ അഭിനന്ദിച്ച് സന്തോഷ് കീഴാറ്റൂർ
കണ്ണൂർ : നവകേരള സദസിന് അഭിനന്ദനവുമായി നടൻ സന്തോഷ് കീഴാറ്റൂർ. സദസിൽ മുഖ്യമന്ത്രിയുടെയും മന്ത്രിമാരുടെയും മുന്നിൽ വെച്ച ആവശ്യങ്ങൾക്ക് ഉടൻ തന്നെ തീരുമാനമായെന്നും പറഞ്ഞറിയിക്കാൻ പറ്റാത്ത സന്തോഷം തോന്നുന്നുവെന്നും സന്തോഷ് കീഴാറ്റൂർ ഫേസ്ബുക്കിൽ കുറിച്ചു.
അവശ കലാകാര പെൻഷൻ എന്നത് കലാകാര പെൻഷൻ എന്നാക്കണമെന്നായിരുന്നു സന്തോഷ് കീഴാറ്റൂരിന്റെ ആവശ്യം. ഇത് കലാകാര പെൻഷൻ എന്നാക്കാമെന്ന് മുഖ്യമന്ത്രി ഉറപ്പ് നൽകിയതായി നടൻ കുറിച്ചു. കൂടാതെ കലാകാര പെൻഷൻ 1000 രൂപയിൽ നിന്നും 1600 രൂപയാക്കി വർധിപ്പിച്ചുവെന്നും ഉപയോഗ ശൂന്യമായി കിടക്കുന്ന സർക്കാർ കെട്ടിടങ്ങൾ സിനിമാ ഷൂട്ടിംഗിന് വിട്ടു തരാം എന്ന് മുഖ്യമന്ത്രി ഉറപ്പ് നൽകിയതായും സന്തോഷ് കീഴാറ്റൂർ പറഞ്ഞു.
കേരളത്തിലെ ആദ്യ നാടകശാല കായംകുളത്ത് തോപ്പിൽ ഭാസി സ്മാരക നാടകശാലയെന്ന പേരിൽ തുടങ്ങാൻ തീരുമാനമായതായും നടൻ പറഞ്ഞു.
നവ കേരള സദസും കേരള സർക്കാരും കൂടുതൽ ജനപ്രിയമാവുകയാമെന്നും കൈയ്യടിക്കേണ്ടവർക്ക് കൈയ്യടിക്കാം വിമർശിക്കുന്നവർ വിമർശിച്ചു കൊണ്ടേ ഇരിക്കുക എന്നും പറഞ്ഞാണ് കുറിപ്പ് അവസാനിക്കുന്നത്
