ഗാന്ധിജയന്തി ദിനം: കൊയിലാണ്ടി നഗരസഭ ശുചീകരണവും ശുചിത്വ സന്ദേശ റാലിയും നടത്തി
കൊയിലാണ്ടി നഗരസഭ മാലിന്യമുക്ത നവകേരളം പദ്ധതിയുടെ ഭാഗമായി ഗാന്ധിജയന്തി ദിനത്തിൽ ശുചീകരണവും ശുചിത്വ സന്ദേശ റാലിയും നടത്തി. നഗരത്തിൽ ശുചിത്വ സന്ദേശ റാലിക്ക് ശേഷം നഗരത്തെ 5 മേഖലകളായി തിരിച്ചാണ് ശുചീകരണം നടത്തിയത്. ശുചീകരണം നഗരസഭ ചെയർപേഴ്സൺ കെ പി സുധ ഉദ്ഘാടനം ചെയ്തു. വൈസ് ചെയർമാൻ അഡ്വ. കെ സത്യൻ അധ്യക്ഷത വഹിച്ചു.
സ്റ്റാൻഡിങ് കമ്മിറ്റി ചെയർമാൻമാരായ ഇ കെ അജിത്ത് മാസ്റ്റർ, കെ എ ഇന്ദിര ടീച്ചർ, കെ ഷിജു മാസ്റ്റർ, സി പ്രജില എന്നിവർ നേതൃത്വം നൽകി, സന്നദ്ധ പ്രവർത്തകർ, കുടുംബശ്രീ അംഗങ്ങൾ, ഹരിത കർമ്മ സേനാംഗങ്ങൾ, ശുചീകരണ ജീവനക്കാർ, കൗൺസിലർമാർ എന്നിവർ ശുചീകരണ പ്രവർത്തികളിൽ പങ്കെടുത്തു. നഗരസഭാ സെക്രട്ടറി ഇന്ദു എസ് ശങ്കരി സ്വാഗതവും നഗരസഭ ക്ലിൻ സിറ്റി മാനേജർ ടി കെ സതീഷ് കുമാർ നന്ദിയും രേഖപ്പെടുത്തി.
മീത്തല കണ്ടി മുതൽ മാർക്കറ്റ് വരെയും, മാർക്കറ്റ് മുതൽ എസ് ബി ഐ ബാങ്ക് വരെയും, എസ്ബിഐ മുതൽ സിവിൽ സ്റ്റേഷൻ വരെയും, മാർക്കറ്റും പരിസരവും, ബസ്റ്റാൻഡ് പരിസരവുമാണ് ശുചീകരിച്ചത്. ശുചീകരണത്തിലൂടെ ശേഖരിച്ച അജൈവ പാഴ് വസ്തുക്കൾ നഗരസഭ എംസിഎഫിലേക്ക് മാറ്റിയിട്ടുണ്ട്.
