മോളിവുഡിലെ ജനപ്രയതാരമായി കാവ്യാമാധവനെ തിരഞ്ഞെടുത്തു
കൊച്ചി : മോളിവുഡിലെ ജനപ്രയതാരമായി കാവ്യാമാധവനെ തിരഞ്ഞെടുത്തു. ആഗോളതലത്തില്‍ മലയാള ചലച്ചിത്ര താരങ്ങളുടെ ജനപ്രീതി കണ്ടെത്താന്‍, ഇന്റല്‍ കോര്‍പറേഷന്റെ കമ്പ്യൂട്ടര്‍ സുരക്ഷ വിഭാഗമായ മക്ഫെ നടത്തിയ ഓണ്‍ലൈന്‍ സര്‍വേയിലാണ് 2016 ലെ ഏറ്റവും ജനപ്രീതിയുള്ള മലയാള താരമായി കാവ്യമാധവന്‍ തെരഞ്ഞെടുക്കപ്പെട്ടത്.
കഴിഞ്ഞ വര്‍ഷം ഒന്നാം സ്ഥാനത്തായിരുന്ന നടന്‍ ജയസൂര്യയെ രണ്ടാംസ്ഥാനത്തേക്ക് പിന്തള്ളിയാണ് കാവ്യ ഈ വര്‍ഷം ഒന്നാമതെത്തിയത്. കഴിഞ്ഞവര്‍ഷം കാവ്യ 6-ാം സ്ഥാനത്തായിരുന്നു. 2015 ല്‍ രണ്ടാമതായിരുന്ന നിവിന്‍ പോളി ഇക്കുറി മൂന്നാമതാണ്. 2015 ല്‍ ഏഴാം സ്ഥാനത്തായിരുന്ന മഞ്ജുവാര്യര്‍ നാലമതെത്തിയിട്ടുണ്ട്. കഴിഞ്ഞ തവണ എട്ടാമതായിരുന്ന പാര്‍വതി ഈ വര്‍ഷം പട്ടികയില്‍ ആദ്യമായി ഇടംനേടിയ നയന്‍താരയ്ക്കൊപ്പം അഞ്ചാംസ്ഥാനം പങ്കിട്ടു.
ബ്രോഡ്ബാന്‍ഡിന്റെ വ്യാപ്തി വര്‍ധിച്ചതിനാല്‍ അവാര്‍ഡുകള്‍, ടിവി ഷോകള്‍, ചലച്ചിത്ര വിശേഷങ്ങള്‍, പുതിയ ആല്‍ബങ്ങള്‍, താരവിശേഷങ്ങള്‍ എന്നിവ അറിയാനായി പ്രേക്ഷകര്‍ കൂടുതലായി ഇന്റര്‍നെറ്റിനെ ആശ്രയിക്കുന്നുണ്ട്. ഇതിനൊപ്പം തന്നെ ഹാക്കര്‍മാരുടെ സ്വാധീനവും വര്‍ധിച്ചിട്ടുണ്ട്. ആരാധകരുടെ പാസ് വേര്‍ഡും വ്യക്തിഗത വിവരങ്ങളും വൈറസുള്ള സൈറ്റുകളിലൂടെ അവര്‍ മോഷ്ടിക്കുകയും ചെയ്യുന്നു.
രാജ്യത്ത് സൈബര്‍ കുറ്റകൃത്യങ്ങള്‍ വര്‍ധിച്ചു വരികയാണ്. ഇതിനെതിരെ ഉപഭോക്താക്കളെ സംരക്ഷിക്കുകയും ഓണ്‍ലൈന്‍ ഉപയോഗം കുറ്റമറ്റതാക്കുകയും ആണ് മക്ഫെയുടെ ഉദ്ദേശ്യം. ഗോസിപ്പുകളുള്‍പ്പെടുന്ന വൈറസുകള്‍ അടങ്ങിയ ഫയല്‍ സൃഷ്ടിക്കാനായി സൈബര്‍ ക്രിമിനലുകള്‍ ഏറ്റവും കൂടുതല്‍ ലക്ഷ്യമിടുന്നത് സിനിമാതാരങ്ങളെയാണ്.
ഏറ്റവും കൂടുതല്‍ റിസ്ക് കവറേജുള്ള ഈ വര്‍ഷത്തെ ആദ്യ 12 താരങ്ങളില്‍ കാവ്യാമാധവന്‍ (11.00%), ജയസൂര്യ (10.33%), നിവിന്‍ പോളി (09.33%), മഞ്ജുവാര്യര്‍ (08.33%), പാര്‍വതി (08.17%), നയന്‍താര (08.17%), നമിത പ്രമോദ് (07.67%), മമ്മൂട്ടി (07.50%), പൃഥ്വിരാജ് (07.33%), റീമ കല്ലിങ്കല്‍ (07.17%) സായി പല്ലവി (07.00%), ഇഷ തല്‍വാര്‍ (07.00%) എന്നിവര്‍ ഉള്‍പ്പെടുന്നു.
