ജനങ്ങളെ ഭീതിയിലാഴ്ത്തി കോഴിക്കോട്ടും കറുത്ത സ്റ്റിക്കര്‍
അത്തോളി: ജനങ്ങളെ ഭീതിയിലാഴ്ത്തി കോഴിക്കോട്ടും കറുത്ത സ്റ്റിക്കര്‍. അത്തോളി സ്വദേശി ഫിറോസിന്റെ വീട്ടിലാണ് സ്റ്റിക്കര്‍ കണ്ടത്. പോലീസ് അന്വേഷണം തുടങ്ങി. വീട്ടിന്‍റെ വലതുഭാഗത്തുള്ള ജനലിലും, മെയിന്‍സ്വിച്ചിലുമാണ് കറുത്ത സ്റ്റിക്കര്‍ പതിച്ചിരിക്കുന്നത്. ഉച്ചയോടെയാണ് വീട്ടുകാരുടെ ശ്രദ്ധയില്‍പെട്ടത്. സമാന സംഭവം പലയിടങ്ങളിലും റിപ്പോര്‍ട്ട് ചെയ്തതിനാല്‍ അത്തോളി പോലീസിനെ വിവരം അറിയിച്ചു.
2 ദിവസം മുമ്പ്‌ ഇതര സംസ്ഥാനക്കാരായ 2 പേര്‍ വസ്ത്രങ്ങള്‍ വില്‍ക്കാന്‍ എത്തിയിരുന്നതായി വീട്ടുകാര്‍ പറയുന്നു. അപരിചിതരായ മറ്റാരും അടുത്തെങ്ങും വീട്ടിലെത്തിയിട്ടില്ലെന്നാണ് ഇവര്‍ പറയുന്നത്. കറുത്ത സ്റ്റിക്കര്‍ പതിച്ച വീടുകളില്‍ മോഷണം നടക്കാനും, കുട്ടികളെ തട്ടിക്കൊണ്ടു പോകാനും സാധ്യതയുണ്ടെന്ന പ്രചരണം സമൂഹ മാധ്യമങ്ങളിലും ശക്തമാണ്. വീട്ടുകാരുടെ പരാതിയെ തുടര്‍ന്ന് അത്തോളി പോലീസ് അന്വേഷണം തുടങ്ങി.
