വയനാടിന് സഹായഹസ്തവുമായി പ്രവാസ സംഘടനയായ ഓർമ; 40 ലക്ഷം രൂപ ദുരിതാശ്വാസ നിധിയിലേക്ക് കൈമാറി
വയനാട് ദുരന്തത്തിൽ അകപ്പെട്ടവരെ ചേർത്തുപിടിക്കാൻ സഹായഹസ്തവുമായി പ്രവാസ സംഘടനയായ ഓർമ. 35 ലക്ഷം രൂപയുടെ ചെക്ക് മുഖ്യമന്ത്രിക്കും 5 ലക്ഷം രൂപ ബാങ്ക് ട്രാൻസ്ഫർ വഴിയും ഇതിനോടകം 40 ലക്ഷം രൂപയാണ് ഓർമ മുഖ്യമന്ത്രിയുടെ ദുരിതാശ്വാസ നിധിയിലേക്ക് നൽകിയത്. പ്രവാസക്ഷേമനിധി ബോർഡ് ഡയറക്ടറും ലോകകേരളസഭാംഗവും ഓർമയുടെ മുൻ പ്രസിഡന്റും ആയ എൻ കെ കുഞ്ഞഹമ്മദ് ആണ് ചെക്ക് മുഖ്യമന്ത്രിക്ക് നേരിട്ടെത്തി കൈമാറിയത്.
ഓർമ സെൻട്രൽ കമ്മറ്റി അംഗങ്ങൾ ആയ റിയാസ് സി കെ , സന്തോഷ് എന്നിവരും സന്നിഹിതരായിരുന്നു. ദുരിതത്തിൽ അകപ്പെട്ടവർക്ക് പുരധിവാസം സാധ്യമാകുന്നത് വരെ താമസിക്കാൻ ഓർമ അംഗം മാനന്തവാടിയിലെ 2 ഫ്ലാറ്റുകളും വിട്ടു നൽകിയിട്ടുണ്ട്. ഇനിയും തങ്ങളാൽ ആവും വിധം പുനരധിവാസ പ്രവർത്തനങ്ങളിൽ പങ്കാളികളാകും എന്ന് ഓർമ പ്രസിഡണ്ട് ഷിജു ബഷീർ ജനറൽ സെക്രട്ടറി പ്രദീപ് തോപ്പിൽ എന്നിവർ അറിയിച്ചു.
