കുത്തിവയ്പ്പെടുക്കാനെത്തിയ ആരോഗ്യവകുപ്പ് അധികൃതര്‍ക്കു മര്‍ദനമേറ്റ സംഭവത്തില്‍ രണ്ടുപേര്‍ അറസ്റ്റില്‍
കോഴിക്കോട്: മീസല്‍സ് റുബെല്ല പ്രതിരോധ കുത്തിവയ്പ്പെടുക്കാനെത്തിയ ആരോഗ്യവകുപ്പ് അധികൃതര്‍ക്കു മര്‍ദനമേറ്റ സംഭവത്തില്‍ രണ്ടുപേര്‍ അറസ്റ്റില്‍. എടയൂര്‍ സ്വദേശികളായ മുബഷിര്‍, സഫ്വാന്‍ എന്നിവരെയാണു വളാഞ്ചേരി പോലീസ് കസ്റ്റഡിയിലെടുത്തത്. മറ്റുള്ളവര്‍ക്കായി പോലീസ് തെരച്ചില്‍ തുടരുകയാണ്.
എടയൂര്‍ പഞ്ചായത്തിലെ അത്തിപ്പറ്റ ജിഎല്‍പി സ്കൂളില്‍ കുത്തിവയ്പ്പെടുക്കാനെത്തിയ ആരോഗ്യവകുപ്പ് അധികൃതര്‍ക്കാണ് യുവാക്കളുടെ മര്‍ദനമേറ്റത്. വാക്സിനെടുക്കുന്നതിനിടെ ഒരു സംഘം യുവാക്കളെത്തി നഴ്സിന്‍റെ കൈപിടിച്ച്‌ വലിക്കുകയും മൊബൈല്‍ ഫോണ്‍ എറിഞ്ഞു പൊട്ടിക്കുകയും ചെയ്തു. പരിക്കേറ്റ എടയൂര്‍ പ്രാഥമികാരോഗ്യ കേന്ദ്രത്തിലെ ജൂണിയര്‍ ഹെല്‍ത്ത് നഴ്സ് ശ്യാമള കുറ്റിപ്പുറം താലൂക്ക് ആശുപത്രിയില്‍ ചികിത്സയിലാണ്.
മാരാകായുധങ്ങളുമായാണ് അക്രമിസംഘം എത്തിയതെന്ന് എടയൂര്‍ മെഡിക്കല്‍ ഓഫീസര്‍ ഡോ.അലി അഹമ്മദ് പറഞ്ഞു. മീസല്‍സ് റുബെല്ല വാക്സിന്‍ കാന്പയിന്‍ അവസാനദിവസങ്ങളിലേക്കടുക്കുന്പോഴാണ് സംഘര്‍ഷമുണ്ടായത്.
