ആറുവര്‍ഷത്തിനുശേഷം ഗോകുല്‍ നാട്ടിലേക്ക് മടങ്ങുന്നു
കോഴിക്കോട് : ആറുവര്‍ഷത്തിനുശേഷം ഗോകുല്‍ നാട്ടിലേക്ക് മടങ്ങുന്നു. മൂന്നു വര്‍ഷത്തിലേറെയായി കോഴിക്കോട് സാമൂഹിക ക്ഷേമവകുപ്പിനു കീഴിലെ എച്ച്‌.എം.ഡി.സിയിലെ അന്തേവാസിയാണ് സംസാരശേഷിയും കേള്‍വിശേഷിയും ഇല്ലാത്ത ഗോകുല്‍. തന്നെ കൊണ്ടുപോകാന്‍ ഞായറാഴ്ച ഉച്ചയോടെ ബന്ധുക്കള്‍ പുണ്യഭവനില്‍ എത്തിയപ്പോള്‍ ഇരിക്കാന്‍ കസേര നിരത്താനും പരിചയക്കാരോട് കൈപിടിച്ചും അടുത്തുകൂടിയും സ്നേഹപ്രകടനങ്ങള്‍ നടത്താനും ഏറെ ആവേശമായിരുന്നു ഗോകുലിന്.. ആറു വര്‍ഷത്തിനുശേഷം പിതാവിനെയും ബന്ധുവിനെയും നേരില്‍ കണ്ടപ്പോള്‍ ഉത്തര്‍പ്രദേശുകാരനായ ഗോകുലി‍െന്‍റ ഉള്ളില്‍ അലതല്ലിയ സന്തോഷത്തിന് അതിരുകളില്ലായിരുന്നു. ജീവിതം തകിടം മറിച്ച ആറുവര്‍ഷം മുമ്ബത്തെ രാത്രിയെക്കുറിച്ച്‌ ഓര്‍ക്കാന്‍ ഉത്തര്‍പ്രദേശിലെ ജാലൂന്‍ ജില്ലക്കാരനായ ഗോകുലി‍െന്‍റ പിതാവ് ഓം പ്രകാശ് സിങ്ങിന് ഇഷ്ടമില്ല. ഒരു രാത്രി ഉറങ്ങിയെഴുന്നേല്‍ക്കുമ്ബോള്‍ മകന്‍ വീട്ടിലുണ്ടായിരുന്നില്ലെന്ന് ഓം പ്രകാശ് പറയുന്നു.
നിസ്സാര കാരണങ്ങള്‍ക്ക് ഇടക്കിടക്ക് വീട്ടില്‍നിന്ന് തെറ്റിപ്പിരിഞ്ഞുപോകുന്ന പ്രകൃതമായിരുന്നു ഗോകുലിന്. ഉടന്‍ തിരിച്ചുവരുമെന്ന പ്രതീക്ഷക്ക് ദിവസങ്ങള്‍ കഴിഞ്ഞതോടെ മങ്ങലേറ്റു. മക‍െന്‍റ തിരോധാനത്തിന് സാധ്യമായ അന്വേഷണങ്ങളെല്ലാം കൂലിപ്പണിക്കാരനായ ഓം പ്രകാശ് നടത്തി. ഇതിനിടയില്‍ 2016ല്‍ ഗോകുല്‍ തിരുവനന്തപുരത്ത് എത്തിപ്പെടുകയായിരുന്നു. രണ്ടു വര്‍ഷം സാമൂഹികക്ഷേമവകുപ്പിനു കീഴിലെ കേന്ദ്രത്തില്‍ കഴിഞ്ഞ ഗോകുലി‍െന്‍റ ബുദ്ധിശക്തിക്കൊരു കുഴപ്പവുമില്ലാത്തതിനാല്‍ മാനസികാരോഗ്യം വീണ്ടെടുക്കാന്‍ കോഴിക്കോട്ടെ എച്ച്‌.എം.ഡി.സിയിലേക്ക് അയക്കുകയായിരുന്നു. കോവിഡ് മൂലം മറ്റു കേന്ദ്രങ്ങളിലായ കുട്ടികള്‍ വെള്ളിമാട്കുന്നില്‍ തിരിച്ചെത്തിയപ്പോള്‍ ഇവിടത്തെ സൂപ്രണ്ടായ വി.ജി. ജയകുമാറി‍െന്‍റ ശ്രദ്ധയില്‍ ഗോകുലി‍െന്‍റ കൈയിലെ അവ്യക്തമായ പച്ചകുത്തല്‍ പെട്ടു. പത്തു നമ്ബറുകള്‍ ഉള്ളതിനാല്‍ മൊബൈല്‍ നമ്ബര്‍ ആകുമെന്ന് ഉറപ്പിക്കുകയായിരുന്നു.
ചൈല്‍ഡ് വെല്‍ഫെയര്‍ ഇന്‍സ്ട്രക്ടര്‍ ഒ.കെ. മുഹമ്മദ് അഷ്റഫി‍െന്‍റയും ശിവന്‍ കോട്ടൂളിയുടെയും സഹായത്തോടെ നടത്തിയ ശ്രമത്തില്‍ നമ്ബര്‍ ഉടമ ഗോകുലി‍െന്‍റ ബന്ധുവാണെന്ന് തിരിച്ചറിഞ്ഞു. ഇടക്ക് കാണാതാവുന്നതിനാല്‍ ബന്ധു മൊബൈല്‍ നമ്ബര്‍ ഗോകുലി‍െന്‍റ ൈകയില്‍ പച്ചകുത്തിയിടുകയായിരുന്നു. ബന്ധം കിട്ടിയതോടെ തിരുവനന്തപുരത്തെ സാമൂഹിക ക്ഷേമ വകുപ്പ് ഉദ്യോഗസ്ഥര്‍ ഗോകുല്‍ എന്ന പേര്‍ നല്‍കിയ ആള്‍ രവിയാണെന്ന് മനസ്സിലാക്കി. അമ്മയെയും ഏക സഹോദരിയെയും പിതാവിനെയും വിഡിയോ കാളിലൂടെ കണ്ടതോടെ നാടുപിടിക്കാനുള്ള തിടുക്കത്തിലായിരുന്നു ഗോകുല്‍. അവസാനം നേരില്‍ കണ്ടതോടെ നാട്ടിലേക്കുള്ള യാത്രക്ക് തിടുക്കംകൂട്ടി. സി.ഡബ്ല്യൂ.സി അംഗങ്ങളായ അഡ്വ.സോണി, അഡ്വ. തോമസ്, സ്മിത എന്നിവരെത്തി രേഖകള്‍ തയാറാക്കി. ഗോകുല്‍ എന്ന രവിക്കും ബന്ധുക്കള്‍ക്കുമുള്ള ട്രെയിന്‍ ടിക്കറ്റും സ്നേഹോപഹാരങ്ങളും ചെറിയ സാമ്ബത്തിക സഹായവും സൂപ്രണ്ടായ വി.ജി. ജയകുമാറി‍െന്‍റ നേതൃത്വത്തിലുള്ള സംഘം നല്‍കി. തിങ്കളാഴ്ച ഉച്ചയോടെ നാട്ടിലേക്ക് മടങ്ങും.
