സ്വർണ്ണവില പവന് 10,000 രൂപ വരെ കുറഞ്ഞേക്കാം! വിപണിയിൽ വൻ ഇടിവ് പ്രവചിച്ച് വേൾഡ് ഗോൾഡ് കൗൺസിൽ
ന്യൂഡൽഹി: ആഗോള വിപണിയിലെ സ്വർണ്ണവിലയിൽ വലിയ രീതിയിലുള്ള ഇടിവ് പ്രവചിച്ച് വേൾഡ് ഗോൾഡ് കൗൺസിൽ. വരും മാസങ്ങളിൽ സ്വർണ്ണവിലയിൽ നിലവിലുള്ള നിരക്കിൽ നിന്നും 10 ശതമാനത്തിലധികം ഇടിവുണ്ടാകാൻ സാധ്യതയുണ്ടെന്നാണ് പുതിയ റിപ്പോർട്ടുകൾ സൂചിപ്പിക്കുന്നത്. എന്നാൽ, വിലയിലുണ്ടാകുന്ന ഈ തിരുത്തൽ വിപണിയിലേക്ക് ദീർഘകാല നിക്ഷേപകരെയും ഉപഭോക്താക്കളെയും വൻതോതിൽ ആകർഷിക്കുമെന്നും, ഇത് സ്വർണ്ണവിലയ്ക്ക് വീണ്ടും ശക്തമായ പിന്തുണ നൽകുമെന്നും കൗൺസിൽ വ്യക്തമാക്കുന്നു.
ജനുവരിയിൽ ഔൺസിന് 5,405 ഡോളർ എന്ന റെക്കോർഡ് ഉയരത്തിലെത്തിയ സ്വർണ്ണവില, ജൂൺ മാസത്തോടെ 4,000 ഡോളറിന് താഴേക്ക് കുത്തനെ ഇടിഞ്ഞിരുന്നു. ഈ വർഷം ഇതുവരെ വിലയിൽ 7 ശതമാനത്തിന്റെ കുറവാണ് രേഖപ്പെടുത്തിയിട്ടുള്ളത്. അമേരിക്കയും ഇറാനും തമ്മിലുള്ള ഭൗമരാഷ്ട്രീയ സംഘർഷങ്ങളാണ് ഈ വർഷത്തിന്റെ ആദ്യ പകുതിയിൽ സ്വർണ്ണവിലയെ സ്വാധീനിച്ച പ്രധാന ഘടകം.
