ഹിന്ദുശാസ‌്ത്രത്തില്‍ ഒരിടത്തും ശബരിമലയില്‍ സ‌്ത്രീകള്‍ പ്രവേശിക്കുന്നത‌് വിലക്കിയിട്ടില്ല: പേജാവര്‍ മഠാധിപതി
മംഗളൂരു: ഹിന്ദുശാസ‌്ത്രത്തില്‍ ഒരിടത്തും ശബരിമലയില്‍ സ‌്ത്രീകള്‍ പ്രവേശിക്കുന്നത‌് വിലക്കിയിട്ടില്ലെന്ന‌് പേജാവര്‍ മഠാധിപതി വിശ്വേശ തീര്‍ഥ പറഞ്ഞു. നൂറ്റാണ്ടുക‌ളായി ക്ഷേത്രങ്ങളില്‍ സ‌്ത്രീ പ്രവേശം അനുവദനീയമാണ‌്. അതുകൊണ്ടു തന്നെ യുവതീപ്രവേശനം ഒരുവിഷയമായി തോന്നിയിട്ടില്ല.
മുമ്ബ‌് ആചാരത്തിന്റെ ഭാഗമായി ദലിതര്‍ക്ക‌് ക്ഷേത്ര പ്രവേശനം വിലക്കിയിരുന്നു. പക്ഷേ ദലിതര്‍ ക്ഷേത്രത്തില്‍ പ്രവേശിച്ചപ്പോള്‍ ഈ ആചാരം ഇല്ലാതായി. വിശ്വഹിന്ദു പരിഷത്ത‌് മുന്‍ ദേശീയ ഉപാധ്യക്ഷന്‍ കൂടിയായ വിശ്വേശ തീര്‍ഥ പറഞ്ഞു.
സ‌്ത്രീയും പുരുഷനും തുല്യരാണെന്നും അതുകൊണ്ട‌് തന്നെ വിവേചനം പാടില്ലെന്നും ബെലഗാവി ശ്രീശൈല മഠത്തിലെ ഡോ. ചെന്ന സിദ്ധരാമ പണ്ഡിതാരാധ്യയും പറഞ്ഞു. സ്‌ത്രീപ്രവേശനം അനുവദിച്ചു സുപ്രീംകോടതി വിധിയെ അവര്‍ പ്രശംസിച്ചു. സ്ത്രീകള്‍ക്ക് പുരുഷന്മാരെ പോലെ തന്നെ ആരാധിക്കാനുള്ള അവകാശമുണ്ട്.
ആരാധനാ വിഷയങ്ങളില്‍ ഒരു കാരണവശാലും ലിംഗ വിവേചനം കടന്നു വരാന്‍ പാടില്ല. കാലം മാറുന്നതിനനുസരിച്ചും ആളുകള്‍ മാറുന്നതിനനുസരിച്ചും ക്ഷേത്രങ്ങളുടെ നിയമങ്ങളും മാറണം. അദ്ദേഹം പറഞ്ഞു. സ്ത്രീകള്‍ക്ക് ക്ഷേത്രപ്രവേശനം അനുവദിക്കുന്നത് മികച്ച വികാസമായാണ് താന്‍ കാണുന്നതെന്നും അദ്ദേഹം പറഞ്ഞു.
