നിയമസഭയിൽ പങ്കെടുക്കാനെത്തിയ രാഹുൽ മാങ്കൂട്ടത്തിലിനെ പൂർണമായും തള്ളിപറഞ്ഞ് കോൺഗ്രസ് നേതാക്കൾ
ലൈംഗീകാരോപണ വിവാദങ്ങൾക്കിടെ നിയമസഭയിൽ പങ്കെടുക്കാനെത്തിയ രാഹുൽ മാങ്കൂട്ടത്തിലിനെ പൂർണമായും തള്ളിപറഞ്ഞ് കോൺഗ്രസ് നേതാക്കൾ. നിയമസഭയിൽ പങ്കെടുക്കാൻ രാഹുലിനെ പ്രതിപക്ഷനേതാവ് വിലക്കിയിരുന്നു. എന്നാൽ ഇതിനെ അവഗണിച്ച് നിയമസഭയിലെത്തിയ രാഹുലിനെതിരെ അതൃപ്തി പരസ്യമാക്കി നേതാക്കൾ രംഗത്തെത്തിയിരിക്കുകയാണ്.
രാഹുല്‍ സഭയില്‍ എത്തിയതുമായി ബന്ധപ്പെട്ട് കോണ്‍ഗ്രസ് പ്രതികരിക്കേണ്ട ആവശ്യമില്ലെന്നാണ് കെ മുരളീധരൻ പറഞ്ഞത്. രാഹുൽ സഭയിൽ പങ്കെടുത്തത് പാർട്ടിക്ക് അന്വേഷിക്കേണ്ട കാര്യം ഇല്ലെന്നും രാഹുൽ പങ്കെടുക്കുകയോ പങ്കെടുക്കാതിരിക്കുകയോ ചെയ്യട്ടെ എന്നുമാണ് അദ്ദേഹം മാധ്യമങ്ങളോടായി പറഞ്ഞത്.
പ്രതിപക്ഷ നേതാവ് വി.ഡി സതീശന്റെ നിലപാടിനെ ധിക്കരിച്ചുള്ള രാഹുലിന്റെ സഭയിലെ സാന്നിധ്യം കെപിസിസി നേതൃയോഗം ചര്‍ച്ച ചെയ്യുമെന്നാണ് കൊടിക്കുന്നില്‍ സുരേഷ് എംപി പറഞ്ഞത്. രാഹുൽ പാർലമെൻ്റ് പാർട്ടിയിലെ അംഗമല്ല. അതുകൊണ്ട് തന്നെ രാഹുൽ സഭയിൽ എത്തിയ കാര്യത്തെക്കുറിച്ച് പറയാൻ കോൺഗ്രസ് ബാധ്യസ്ഥരല്ലെന്നും പിന്നെ എന്തിന് മറുപടി പറയണം. എന്നുമാണ് അദ്ദേഹം മാധ്യമങ്ങളോട് പ്രതികരിച്ചത്. അതേസമയം യൂത്ത് കോണ്‍ഗ്രസ് നേതാവ് രാഹുലിനെ അനുഗമിച്ചത് കോണ്‍ഗ്രസിനെ വെട്ടിലാക്കിയിരിക്കുകയാണ്. യൂത്ത് കോൺഗ്രസ് തിരുവനന്തപുരം ജില്ലാ പ്രസിഡണ്ട് നേമം ഷജീറിനും സന്തതസഹചാരി റിനോ പി രാജനുമൊപ്പമാണ് രാഹുൽ നിയമസഭയിൽ എത്തിയത്.
