മദ്യം, മയക്കുമരുന്ന് തുടങ്ങിയവയില് നിന്ന് യുവതയെ മോചിപ്പിക്കാന് വിമുക്തി വരുന്നു
കോഴിക്കോട്: മദ്യം, മയക്കുമരുന്ന് തുടങ്ങിയവയില് നിന്ന് യുവജനങ്ങളെ മോചിപ്പിക്കാന് സര്ക്കാര് കൊണ്ടുവന്ന വിമുക്തി പദ്ധതി നഗരസഭാ പരിധിയില് നടപ്പാക്കുന്നു. മേയര് തോട്ടത്തില് രവീന്ദ്രന് ചെയര്മാനും, സെക്രട്ടറി മൃണ്മയി ജോഷി കണ്വീനറുമായ നഗരസഭാതല കമ്മിറ്റി രൂപീകരിച്ചു. ഫെബ്രുവരി രണ്ടാം വാരത്തില് മുതലക്കുളം മൈതാനിയില് നടക്കുന്ന വിപുലമായ ചടങ്ങില് എക്സൈസ് മന്ത്രി ടി.കെ.രാമകൃഷ്ണന് പദ്ധതി ഉദ്ഘാടനം ചെയ്യും. പദ്ധതിയുടെ വിശദാംശങ്ങള് വിശദീകരിക്കുന്നതിനായി ഇന്നലെ ചേര്ന്ന പ്രത്യേക നഗരസഭാ കൗണ്സില് യോഗത്തില് എക്സൈസ് അസി.കമ്മീഷണര് എം.ജെ.ജോസഫ് സംബന്ധിച്ചു.
കേരളത്തെ ലഹരിവിമുക്തമാക്കാന് എക്സൈസ് വകുപ്പ് വിവിധ പദ്ധതികള് ആവിഷ്കരിച്ചതായി അദ്ദേഹം പറഞ്ഞു. ഫെബ്രുവരിയില് നടക്കുന്ന വിമുക്തി ഉദ്ഘാടന ചടങ്ങില് പതിനായിരം പേരെ പങ്കെടുപ്പിക്കാനാണ് തീരുമാനം. ജില്ലയിലെ ചങ്ങരോത്ത് പഞ്ചായത്തില് നടന്ന “വിമുക്തി’ ഉദ്ഘാടനത്തില് എണ്ണായിരം പേര് പങ്കെടുത്തു. ലഹരി നിര്മാര്ജനം ചെയ്യുന്നതിന് തദ്ദേശസ്ഥാപന പ്രതിനിധികളില് നിന്നും വന് പ്രോത്സാഹനം ലഭിക്കുന്നതായും അദ്ദേഹം പറഞ്ഞു.
നഗരപരിധിയിലെ 75 വാര്ഡുകളിലും ജാഗ്രതാ സമിതികള് രൂപീകരിക്കും. എഴു പേരടങ്ങുന്നതാണ് കമ്മിറ്റി. ലഹരി വില്ക്കുന്നവരെയും പതിവായി ഉപയോഗിക്കുന്നവരെയും സംബന്ധിച്ച് വിവരശേഖരണം നടത്തി നടപടികള് സ്വീകരിക്കും. സ്കൂള്, കോളജ് വിദ്യാര്ഥികള്ക്കിടയില് ഭയാനകമാം വിധം ലഹരി ഉപയോഗം വര്ധിച്ചിട്ടുണ്ട്.
മദ്യത്തിനു പുറമെ മയക്കുമരുന്ന് ഉപയോഗിക്കുന്ന വിദ്യാര്ഥികളും യുവാക്കളും വര്ധിച്ചുവരികയാണ്. സര്ക്കാരിന്റെ വിമുക്തി പദ്ധതിയിലൂടെ ഇതിന് പരിഹാരം കാണാന് കഴിയുമെന്ന് അദ്ദേഹം വിശദീകരിച്ചു.