കോഴിക്കോട്: മൂന്നാമത് കോഴിക്കോട് അന്താരാഷ്ട്ര ചലച്ചിത്രോത്സവത്തിന് ഒമ്പതിന് (വ്യാഴാഴ്ച)
മാനാഞ്ചിറ സ്ക്വയറില് തുടക്കമാകും. പൊതു പ്രദര്ശനങ്ങളുടെ ഉദ്ഘാടനം മേയര് തോട്ടത്തില് രവീന്ദ്രന് നിര്വഹിക്കും. ജയരാജ് സംവിധാനം ചെയ്ത ഒറ്റാല് പ്രദര്ശിപ്പിക്കും.
മേളയില് ഡെലിഗേറ്റുകള്ക്കുവേണ്ടിയുള്ള പ്രദര്ശനങ്ങള് 10ന് ടാഗോര് ഹാളില് രാവിലെ ഒമ്പതിനുള്ള പ്രദര്ശനത്തോടെ ആരംഭിക്കും. ഉദ്ഘാടനം വൈകുന്നേരം 5.30ന് ചലച്ചിത്ര അക്കാദമി ചെയര്മാന് കമല് നിര്വഹിക്കും. മെക്സിക്കന് ചലച്ചിത്ര വെയര്ഹൗസ് ആണ് ഉദ്ഘാടന ചിത്രം.
മേളയില് മലയാളം സിനിമാ വിഭാഗത്തിലേക്ക് എട്ട് ചിത്രങ്ങള് തെരഞ്ഞെടുത്തു. ആറടി (സംവിധാനം സജി പലമേല്), മണ്ട്രോ തുരുത്ത് (പിഎസ് മനു), ഒറ്റയാള് പാത (സതീഷ് ആന്ഡ് സന്തോഷ് ബാബുസേനന്), പതിനൊന്നാം സ്ഥലം (രഞ്ജിത്ത് (ചിറ്റാടെ), അവസ്ത (ബൈജു ലൈലാരാജ്), മൂന്നാം നാള് ഞായറാഴ്ച (ടി.എ. റസാക്ക്), കഥകളി (സൈജോ) എന്നീ പുതിയ ചിത്രങ്ങളോടൊപ്പം കെ.ജി. ജോര്ജിന്റെ ആദ്യചലച്ചിത്രം സ്വപ്നാടനവും പ്രദര്ശിപ്പിക്കും.
ചലച്ചിത്ര അക്കാദമി, കോഴിക്കോട് കോര്പ്പറേഷന്, അശ്വനി ഫിലിം സൊസൈറ്റി, ബാങ്ക്മെന്സ് ഫിലിം സൊസൈറ്റി എന്നിവ ഫിലിം സൊസൈറ്റി ഫെഡറേഷന്റെയും പ്രസ് ക്ലബ് ഫിലിം സൊസൈറ്റിയുടെയും സഹകരണത്തോടെ സംഘടിപ്പിക്കുന്ന ചലച്ചിത്രോത്സവത്തിലേക്കുള്ള ഡെലിഗേറ്റ് പാസുകള് ഒമ്പതിന് വിതരണം ചെയ്യും.