വര്‍ഷങ്ങളായുള്ള യാത്രാ ക്ലേശത്തിന് പരിഹാരമായില്ല: അയനിക്കാട് തുരുത്ത് നിവാസികള്‍ വോട്ട് ബഹിഷ്കരിക്കും
ഉളേള്യരി: വര്‍ഷങ്ങളായുള്ള യാത്രാ ക്ലേശത്തിന് ശാശ്വതമായ പരിഹാരം ഉണ്ടാവാത്തതില്‍ പ്രതിഷേധിച്ച്‌ അയനിക്കാട് തുരുത്ത് നിവാസികള്‍ വോട്ട് ബഹിഷ്കരണ പ്രഖ്യാപനവുമായി രംഗത്ത്. ഉളേള്യരി ഗ്രാമപഞ്ചായത്തുമായി ബന്ധിപ്പിക്കുന്ന കൊയമ്പ്രത്തുകണ്ടി പാലം വര്‍ഷങ്ങള്‍ കഴിഞ്ഞിട്ടും പ്രാരംഭ പ്രവര്‍ത്തനങ്ങള്‍ പോലും തുടങ്ങാതെ കടലാസില്‍ കിടക്കുകയാണ്. ഇവര്‍ക്ക് തൊട്ടടുത്ത അങ്ങാടിയായ മന്ദങ്കാവിലെത്താന്‍ സഞ്ചാരയോഗ്യമായ നടപ്പാത പോലും ഇല്ല.
മൂന്നു ഭാഗവും പുഴയാല്‍ ചുറ്റപ്പെട്ട തുരുത്തിനെ ഉളേള്യരി ഗ്രാമപഞ്ചായത്തുമായി ബന്ധിപ്പിച്ചുകൊണ്ട് നിര്‍മിക്കുന്ന പാലത്തിന് കഴിഞ്ഞ ബഡ്ജറ്റില്‍ നാലു കോടി രൂപ വകയിരുത്തിയിരുന്നു. അപ്രോച്ച്‌ റോഡും നിര്‍മിക്കേണ്ടതുണ്ട്. സ്വകാര്യവ്യക്തികളുടെ സ്ഥലത്തു കൂടിയാണ് റോഡ് നിര്‍മിക്കേണ്ടത്. എന്നാല്‍, സ്ഥലം ഏറ്റെടുക്കേണ്ട നടപടികള്‍ ഇതുവരെ നടന്നിട്ടില്ല.
40 വോട്ടര്‍മാരാണ് തുരുത്തില്‍ ഉള്ളത്. വോട്ട് ബഹിഷ്കരണ പ്രഖ്യാപന യോഗത്തില്‍ റിജേഷ് അയനിക്കാട് അധ്യക്ഷത വഹിച്ചു. പി.സി. ഭാസ്കരന്‍ എസ്.എസ്. അശ്വതി എന്നിവര്‍ സംസാരിച്ചു.
