ജാതിയുടെ പേരില്‍ തമിഴ്നാട്ടില്‍ ഡിവൈഎഫ്‌ഐ നേതാവിനെ തല്ലിക്കൊന്നു
തച്ചനല്ലൂര്‍: ജാതിയുടെ പേരില്‍ തമിഴ്നാട്ടില്‍ ഡിവൈഎഫ്‌ഐ നേതാവിനെ തല്ലിക്കൊന്നു. തച്ചനല്ലൂരിനു സമീപത്തെ കരൈയിരിപ്പിലാണു സംഭവം. ഡിവൈഎഫ്‌ഐ ജില്ലാ ട്രഷററും പട്ടികജാതി വിഭാഗക്കാരനുമായ അശോക് എന്ന യുവാവാണ് ബുധനാഴ്ച രാത്രി മറ്റൊരു ജാതിക്കാരുടെ ആക്രമണത്തില്‍ കൊല്ലപ്പെട്ടത്.
രാത്രി പതിനൊന്നോടെ വീട്ടിലേക്കു നടന്നുപോകും വഴിയാണ് സംഘം അശോകിനെ ആക്രമിച്ചത്. ഇതിനുശേഷം മൃതദേഹം സമീപത്തെ റെയില്‍വേ ട്രാക്കില്‍ ഉപേക്ഷിച്ചു. ശബ്ദം കേട്ട് ഓടിയെത്തിയവരാണ് രക്തത്തില്‍ കുളിച്ച അശോകിനെ കണ്ടെത്തിയത്. പള്ളര്‍ ജാതിയില്‍ പെട്ടതാണ് അശോക്. തേവര്‍ സമുദായാംഗങ്ങള്‍ ആക്രമണം നടത്തിയതെന്നാണു പോലീസ് നല്‍കുന്ന വിവരം.
താഴ്ന്ന ജാതിക്കാര്‍ക്കു വഴിനടക്കാനുള്ള സ്വാതന്ത്ര്യത്തിനായി സമരം സംഘടിപ്പിച്ച സംഘത്തിന്‍റെ നേതൃത്വത്തില്‍ കൊല്ലപ്പെട്ട അശോകുണ്ടായിരുന്നു. പട്ടികജാതി വിഭാഗത്തില്‍പെട്ടവര്‍ സഞ്ചരിക്കുന്പോള്‍ തേവര്‍ സമുദായത്തില്‍ പെട്ടവര്‍ ഉപദ്രവിക്കുന്നതിന് എതിരേയായിരുന്നു സമരം.
കഴിഞ്ഞ ദിവസം പുല്ലുമായി വഴിയിലൂടെ നടന്നുപോയ അശോകിന്‍റെ അമ്മയെ ഒരു സംഘം ഉപദ്രവിച്ചിരുന്നു. ഇതിനെതിരേ അശോക് പോലീസില്‍ പരാതി നല്‍കിയെങ്കിലും കേസെടുക്കാന്‍ പോലീസ് തയാറായില്ല. ഇതിനു പിന്നാലെയാണ് അശോകിന്‍റെ കൊലപാതകം. ഇതേതുടര്‍ന്ന് കഴിഞ്ഞ ദിവസം രാത്രി അശോകിന്‍റെ ബന്ധുക്കളും നാട്ടുകാരും റോഡ് ഉപരോധിച്ചു പ്രതിഷേധിച്ചു.
