കര്‍ഷക ആത്മഹത്യകള്‍ ലോക്സഭയില്‍ ഉന്നയിച്ച്‌ രാഹുല്‍ ഗാന്ധി
ഡല്‍ഹി: കേരളത്തിലെ കര്‍ഷക ആത്മഹത്യകള്‍ ലോക്സഭയില്‍ ഉന്നയിച്ച്‌ കോണ്‍ഗ്രസ് മുന്‍ അധ്യക്ഷനും വയനാട് എംപിയുമായ രാഹുല്‍ ഗാന്ധി. കര്‍ഷകര്‍ എടുത്ത വായ്പകള്‍ക്കുള്ള മൊറട്ടോറിയം നീട്ടാന്‍ ബാങ്കുകള്‍ക്ക് കേന്ദ്രസര്‍ക്കാര്‍ നിര്‍ദേശം നല്‍കണമെന്ന് രാഹുല്‍ ലോക്സഭയില്‍ ആവശ്യപ്പെട്ടു.
കേരള സര്‍ക്കാരിന്‍റെ ആവശ്യം അംഗീകരിക്കാന്‍ ആര്‍ബിഐക്ക് കേന്ദ്രം നിര്‍ദേശം നല്‍കണം. ബാങ്കുകള്‍ ജപ്തി നോട്ടീസ് നല്‍കി കര്‍ഷകരെ ഭീഷണിപ്പെടുത്തുന്നില്ലെന്ന് ഉറപ്പാക്കാനും കേന്ദ്രം റിസര്‍വ് ബാങ്കിനോട് നിര്‍ദേശിക്കണമെന്നും രാഹുല്‍ ലോക്സഭയില്‍ പറഞ്ഞു. വയനാട്ടില്‍ ബുധനാഴ്ച വയനാട്ടില്‍ കടക്കെണി മൂലം ഒരു കര്‍ഷകന്‍ കൂടി ജീവനൊടുക്കി. വയനാട്ടില്‍ 8000 കര്‍ഷകര്‍ക്ക് ബാങ്കുകള്‍ ജപ്തിനോട്ടീസ് അയച്ചിരിക്കുകയാണ്.
വസ്തു ഈടിന്മേല്‍ ആണ് കര്‍ഷകര്‍ വായ്പ എടുത്തിരിക്കുന്നത്. ഇതാണ് കര്‍ഷകരുടെ ആത്മഹത്യക്കു കാരണമാകുന്നതെന്നും രാഹുല്‍ പാര്‍ലമെന്‍റില്‍ പറഞ്ഞു. രാജ്യത്തെ കര്‍ഷകര്‍ ദുരിതത്തിലാണ്. എന്നാല്‍ കര്‍ഷകരുടെ ദുരിതം അകറ്റാന്‍ വേണ്ടിയുള്ള ശക്തമായ ഒരു നടപടിയും കേന്ദ്ര ബജറ്റില്‍ സ്വീകരിച്ചിട്ടില്ലെന്നും രാഹുല്‍ കുറ്റപ്പെടുത്തി.
