പൂനൂര്‍ പുതിയ പാലം നിര്‍മാണം തുടങ്ങി
പൂനൂര്‍: പൂനൂര്‍ പുതിയ പാലം നിര്‍മാണം തുടങ്ങി. കൊയിലാണ്ടി - എടവണ്ണ സംസ്ഥാന പാതയില്‍ ഉണ്ണികുളം-താമരശ്ശേരി പഞ്ചായത്തുകളെ തമ്മില്‍ ബന്ധിപ്പിച്ച്‌ പൂനൂര്‍ പുഴക്കു കുറുകെ കിഫ്ബി പദ്ധതിയില്‍ ഉള്‍പ്പെടുത്തി പൂനൂര്‍ ടൗണില്‍ നിര്‍മിക്കുന്ന പാലത്തിന്‍റെ പ്രവൃത്തി തുടങ്ങി. പഴക്കമുള്ള നിലവിലുള്ള പാലത്തിന് ബലക്ഷയം കണ്ടെത്തിയിരുന്നു. അപകടാവസ്ഥയിലാണിത്. പുതുക്കിപ്പണിയണമെന്ന നാട്ടുകാരുടെ ഏറെക്കാലത്തെ ആവശ്യമാണ് പുതിയ പാലത്തിന്‍റെ നിര്‍മാണത്തോടെ സഫലമാകുന്നത്. മുന്‍ എം.എല്‍.എ പുരുഷന്‍ കടലുണ്ടിയുടെ ഇടപെടലിനെ തുടര്‍ന്ന് പൂനൂര്‍ ടൗണ്‍ സൗന്ദര്യവത്കരണത്തിന് കിഫ്ബിയില്‍ നിന്ന് 10 കോടി രൂപ 2017 ബജറ്റിലാണ് പ്രഖ്യാപിച്ചത്. പദ്ധതിയുടെ ടെന്‍ഡര്‍ നടപടികളുമായി മുന്നോട്ടു പോകുന്നതിനിടെയാണ് വിദഗ്ധരുടെ നേതൃത്വത്തില്‍ നടന്ന പരിശോധനയില്‍ നിലവിലെ പാലത്തിന് ബലക്ഷയം കണ്ടെത്തുകയും പദ്ധതിയുടെ ആദ്യഘട്ടം എന്ന നിലയില്‍ പുതിയ പാലം നിര്‍മാണത്തിന് എസ്റ്റിമേറ്റ് തയാറാക്കി അനുമതി തേടുകയും ചെയ്തിരുന്നു.
4.78 കോടി രൂപയാണ് പാലത്തിന് അനുവദിച്ചത്. ടെന്‍ഡര്‍ എടുത്ത കണ്‍സ്ട്രക്ഷന്‍ കമ്ബനി പിന്മാറിയതോടെ നിര്‍മാണം വഴിമുട്ടി നില്‍ക്കുകയായിരുന്നു. ഇതോടെ രാഷ്ട്രീയ പാര്‍ട്ടികള്‍ക്കിടയിലും പൊതു ജനങ്ങള്‍ക്കിടയിലും ചര്‍ച്ചകള്‍ക്കും പ്രതിഷേധങ്ങള്‍ക്കും കാരണമായി. നിയമസഭ തെരഞ്ഞെടുപ്പിനു മുമ്പ് മറ്റൊരു കമ്പ നി നിര്‍മാണ ചുമതല ഏറ്റെടുക്കുകയും മുന്‍ പൊതുമരാമത്ത് മന്ത്രി ജി. സുധാകരന്‍ കഴിഞ്ഞ ഫെബ്രുവരിയില്‍ പാലത്തിന്‍റെ പ്രവൃത്തി ഉദ്ഘാടനം നിര്‍വഹിക്കുകയും ചെയ്തിരുന്നു. പഴയ പാലം നിലനിര്‍ത്തിയാണ് സമീപത്ത് പുതിയ പാലം നിര്‍മിക്കുന്നത്. ഒരുവശത്ത് നടപ്പാതയും ഇരു ഭാഗങ്ങളിലും അപ്രോച്ച്‌ റോഡും ഉള്‍പ്പെടുത്തിയാണ് ഇപ്പോള്‍ ഫണ്ട് അനുവദിച്ചത്. പാലം നിര്‍മാണം പൂര്‍ത്തിയാകുന്നതോടെ പൂനൂര്‍ ടൗണിന്‍റെ മുഖച്ഛായ മാറും. ഗതാഗതക്കുരുക്കിനും പരിഹാരമാകും.
