പൃഥ്വിരാജിനേയും പാര്‍വതിയേയും സംവിധായകന്‍ കമലിനേയും വെല്ലുവിളിച്ച്‌ ബിജെപി നേതാവ് ശോഭ സുരേന്ദ്രന്‍
പാലക്കാട്: നടീനടന്മാരായ പൃഥ്വിരാജിനേയും പാര്‍വതിയേയും സംവിധായകന്‍ കമലിനേയും വെല്ലുവിളിച്ച്‌ ബിജെപി നേതാവ് ശോഭ സുരേന്ദ്രന്‍. മലയാള സിനിമയിലെ സ്ത്രീകള്‍ നേരിടുന്ന പ്രശ്നങ്ങളെക്കുറിച്ച്‌ പഠിക്കാന്‍ സര്‍ക്കാര്‍ നിയോഗിച്ച ജസ്റ്റീസ് ഹേമ കമ്മീഷന്‍റെ കണ്ടെത്തലുകള്‍ അടങ്ങുന്ന റിപ്പോര്‍ട്ട് മുഖ്യമന്ത്രിക്ക് നല്‍കി ദിവസങ്ങളായിട്ടും സിനിമ മേഖലയില്‍ നിന്ന് പ്രതികരണമുണ്ടാകാത്തത് അമ്പരപ്പിക്കുന്നുവെന്ന് ശോഭ ഫേസ്ബുക്കില്‍ കുറിച്ചു.
ലൈംഗികചൂഷണം ഉള്‍പ്പെടെ ഒട്ടേറെ പീഡനം അനുഭവിക്കേണ്ടി വരുന്നുവെന്ന് അഭിനേതാക്കളായ സ്ത്രീകള്‍ മൊഴി നല്‍കിയെന്ന് കമ്മീഷന്‍ റിപ്പോര്‍ട്ടിലുണ്ട്. പൗരത്വ പ്രശ്നത്തില്‍ തെരുവിലിറങ്ങി സമരം ചെയ്യുകയും സോഷ്യല്‍ മീഡിയ വഴി പ്രചരണം നടത്തുകയും ചെയ്ത പൃഥ്വിരാജ്, പാര്‍വതി, കമല്‍ എന്നിവരുടെയൊന്നും സാമൂഹിക പ്രതിബദ്ധത സ്വന്തം സഹപ്രവര്‍ത്തകരുടെ ആത്മാഭിമാനത്തിന്‍റെ കാര്യത്തില്‍ കാണുന്നില്ലെന്ന് ശോഭ വിമര്‍ശിച്ചു.
കമ്മീഷന്‍ നല്‍കിയ റിപ്പോര്‍ട്ടിന്‍റെ അടിസ്ഥാനത്തില്‍ തുടര്‍ നടപടികളെക്കുറിച്ച്‌ സര്‍ക്കാരിനോട് ചോദിക്കാനോ സ്ത്രീകളുടെ മാനത്തിന് വില കല്‍പിക്കാത്ത കാസ്റ്റിംഗ് കൗച്ചുകാരെ എന്നെന്നേക്കുമായി ബഹിഷ്കരിക്കുമെന്ന് പ്രഖ്യാപിക്കാനോ ഇവര്‍ തയാറായിട്ടില്ല. സ്ഥിരം പ്രക്ഷോഭകാരികളായ സിനിമാക്കാരില്‍ ചിലരുടെ ഈ കാര്യത്തിലെ മൗനത്തിന്‍റെ കാരണം കമ്മീഷന്‍ റിപ്പോര്‍ട്ടിന്‍റെ പൂര്‍ണരൂപം പുറത്തുവരുന്നതോടെ വ്യക്തമാകുമെന്നും ശോഭ അഭിപ്രായപ്പെട്ടു.
