ദേശീയ നൃത്തോത്സവത്തിന് മിഴിവേകാന്‍ മലയാളി ട്രാന്‍സ്ജെന്‍ഡറുകള്‍
കോഴിക്കോട്: ദേശീയ നൃത്തോത്സവത്തിന് മിഴിവേകാന്‍ മലയാളി ട്രാന്‍സ്ജെന്‍ഡറുകള്‍. സംസ്ഥാനത്തു നിന്ന് ആദ്യമായാണ് ദേശീയ നൃത്തോത്സവത്തില്‍ മൂന്നു ട്രാന്‍സ്ജെന്‍ഡറുകള്‍ പങ്കെടുക്കുന്നത്. നൃത്തത്തെ നെഞ്ചോടു ചേര്‍ത്തുപിടിക്കുന്ന കോഴിക്കോട്ടെ സിയപവലും ആര്‍. നിദ്രദേവിയും സഞ്ചന ചന്ദ്രനുമാണ് നടനഭാവത്തിന് ചാരുതപകര്‍ന്ന് ഭാഷയും ദേശവും അതിരിടാത്ത ‘ഭാരത നൃത്ത’ത്തിന് ചുവടുകളാടുന്നത്.
ഐഡയുടെ നേതൃത്വത്തില്‍ നടന്നുവരുന്ന ഓണ്‍ലൈന്‍ ദേശീയ നൃത്തോത്സവത്തിലാണ് കോഴിക്കോട്ടെ ഓം ഡാന്‍സ് സ്കൂളിലെ നര്‍ത്തകരായ ഇവര്‍ പങ്കെടുക്കുന്നത്. മൂന്നുപേരും ചേര്‍ന്നുള്ള പുഷ്പാഞ്ജലിയും വ്യക്തിയിനങ്ങളില്‍ മൂന്നുപേരും വര്‍ണവും ചെയ്താണ് നൂറുകണക്കിന് കലാഗുരുക്കള്‍ കാഴ്ചക്കാരാകുന്ന രാഗഭാവതാളത്തില്‍ പങ്കാളികളാകുന്നത്. ഓം സ്കൂള്‍ ഡയറക്ടറും നൃത്താധ്യാപകനുമായ ഡോ. ഹര്‍ഷന്‍ സെബാസ്റ്റ്യന്‍ ആന്‍റണിക്കു കീഴിലാണ് മൂവരും ഭരതനാട്യം പരിശീലിക്കുന്നത്. സഞ്ചന ചന്ദ്രന്‍ നാലുവര്‍ഷമായി നൃത്തം പരിശീലിക്കുന്നുണ്ട്.
കഴിഞ്ഞ ലോക്ഡൗണ്‍ കാലത്താണ് സിയ പവലും ആര്‍. നിദ്രദേവിയും പാദക്രിയകള്‍ അനുസരിച്ചുള്ള അടവുകള്‍ക്ക് തുടക്കം കുറിച്ചത്. വിനു അമ്ബാടിയാണ് ഇവര്‍ക്കുള്ള നൃത്തങ്ങളുടെ ഗാനങ്ങള്‍ ആലപിച്ചത്.ദീപു തൃശൂരും ക്രിസ്റ്റിന്‍ പാലക്കാടുമാണ് രാജ്യത്തിനുപുറത്തുള്ള വേദികള്‍ മോഹിച്ച്‌ നൃത്തപരിശീലനം നടത്തുന്ന ഇവരെ വേദിയിലേക്ക് അണിയിച്ചൊരുക്കുന്നത്. ദേശീയോദ്ഗ്രഥനം ലക്ഷ്യമിട്ട് നൃത്തമവതരിപ്പിക്കാന്‍ അവസരം നല്‍കണമെന്നാവശ്യെപ്പട്ട് ഇവര്‍ പ്രധാനമന്ത്രിക്ക് അപേക്ഷ നല്‍കിയിരുന്നു.
