കഞ്ചാവ് മാഫിയയുടെ ആക്രമണം; രണ്ടു പേര്‍ക്ക് പരിക്ക്
കോട്ടയം: തിരുവാതുക്കലില്‍ മാരകായുധങ്ങളുമായി എത്തിയ കഞ്ചാവ് മാഫിയ വീടുകയറി ആക്രമിച്ചു. തിരുവാതുക്കല്‍ മാന്താറ്റില്‍ പ്രീമിയര്‍ കോളജിനു സമീപം കളത്തൂത്തറ മെഹബൂബിന്‍റെ വീടാണ് അക്രമി സംഘം തകര്‍ത്തത്. മെഹബൂബ്, അയല്‍വാസി കാര്‍ത്തിക്(24) എന്നിവര്‍ക്കാണ് പരിക്കേറ്റത്.
തലയ്ക്ക് കന്പിവടി ഉപയോഗിച്ച്‌ അടിയേറ്റ കാര്‍ത്തിക് മെഡിക്കല്‍ കോളജിലും, മെഹബൂബ് ജനറല്‍ ആശുപത്രിയിലും ചികിത്സയിലാണ്. ഞായറാഴ്ച വൈകുന്നേരം 4.30-നാണ് സംഭവം. പ്രദേശത്ത് കഞ്ചാവ് മാഫിയയുടെ ശല്യം രൂക്ഷമാണ്. കഴിഞ്ഞ ദിവസം മാഫിയ സംഘവും നാട്ടുകാരും തമ്മില്‍ വാക്കേറ്റവും സംഘര്‍ഷവുമുണ്ടായിരുന്നു. ഇതിനു പ്രതികാരം ചോദിക്കാന്‍ എത്തിയ സംഘമാണ് ആക്രമണം നടത്തിയതെന്നു സംശയിക്കുന്നതായി പോലീസ് പറഞ്ഞു.
കന്പിവടിയും, വടിവാളും ഉള്‍പ്പെടെയുള്ള മാരകായുധങ്ങളുമായി എത്തിയ സംഘം വീടിനുള്ളില്‍ ആക്രമണം നടത്തുകയായിരുന്നു. വീടിന്‍റെ ജനല്‍ ചില്ലുകളും, ഗൃഹോപകരണങ്ങളും സംഘം തല്ലിത്തകര്‍ത്തു. വീട്ടുമുറ്റത്തിരുന്ന ബൈക്ക് അടിച്ചു തകര്‍ത്തു. സംഭവം കണ്ട് ഓടിയെത്തിയ കാര്‍ത്തിക്കിനെയും ആക്രമിക്കുകയായിരുന്നു. സംഭവമറിഞ്ഞു കൂടുതല്‍ ആളുകള്‍ എത്തുകയും, നാട്ടുകാര്‍ പോലീസില്‍ വിവരം അറിയിക്കുകയും ചെയ്തതോടെ സംഘം രക്ഷപ്പെട്ടു.
