പ്രതിപക്ഷ ബഹളത്തെ തുടര്‍ന്ന്‌ ഇന്നും നിയമസഭാ സമ്മേളനം നിര്‍ത്തിവെച്ചു
തിരുവനന്തപുരം: പ്രതിപക്ഷ ബഹളത്തെ തുടര്‍ന്ന്‌ ഇന്നും നിയമസഭാ സമ്മേളനം നിര്‍ത്തിവെച്ചു. ശബരിമല വിഷയം ഉന്നയിച്ചാണ്‌ ഇന്നും പ്രതിപക്ഷം ബഹളം ഉണ്ടാക്കിയത്‌. ഒരേ വിഷയം വീണ്ടും പരിഗണിക്കാനാവില്ലെന്ന്‌ സ്‌പീക്കര്‍ പി ശ്രീരാമകൃഷ്‌ണന്‍ പറഞ്ഞു. പ്രതിപക്ഷം മര്യാദയുടെയും മാന്യതയുടേയും സീമകള്‍ ലംഘിക്കുന്നുവെന്നും ചോദ്യോത്തര വേള തടസ്സപ്പെടുത്തരുതെന്നും സ്‌പീക്കര്‍ ആവശ്യപ്പെട്ടു.
എന്നാല്‍ ചോദ്യോത്തര വേള തുടങ്ങിയപ്പോള്‍ തന്നെ പ്രതിപക്ഷം നടുത്തളത്തിലിറങ്ങി സ്‌പീക്കറുടെ ഡയസിന്‌ മുന്നില്‍ മുദ്രാവാക്യം വിളി തുടങ്ങി. ചോദ്യോത്തര വേള ഒഴിവാക്കി വിഷയം ചര്‍ച്ചചെയ്യണമെന്ന്‌ പ്രതിപക്ഷ നേതാവ്‌ രമേശ്‌ ചെന്നിത്തല ആവശ്യപ്പെട്ടു. എന്നാല്‍ ശബരിമല വിഷയത്തില്‍ വിശദമായ ചര്‍ച്ച നടന്നതാണെന്നും സഭ തടസ്സപ്പെടുത്തരുതെന്നും സപ്‌ക്കര്‍ പറഞ്ഞു. എങ്കിലും ബഹളം തുടര്‍ന്നതോടെ സഭ ഇന്നത്തേക്ക്‌ പിരിഞ്ഞു.
