കോംഗോയില്‍ ഭീഷണി ഉയര്‍ത്തി എബോള വൈറസ് പടരുന്നു
കിന്‍ഷാസ: മധ്യ ആഫ്രിക്കന്‍ രാജ്യമായ കോംഗോയില്‍ ഭീഷണി ഉയര്‍ത്തി എബോള വൈറസ് പടരുന്നു. കിഴക്കന്‍ നഗരമായ ഗോമയിലും എബോള വൈറസ് കണ്ടെത്തി. എബോള വൈറസ് പടരാതിരിക്കാന്‍ ആവശ്യമായ നടപടികള്‍ സ്വീകരിച്ചു വരികയാണെന്ന് ആരോഗ്യമന്ത്രാലയം അറിയിച്ചു.
എബോള ബാധിത പ്രദേശമായ ബുടെംബോയില്‍ നിന്ന് ബസില്‍ ഗോമയില്‍ വന്നിറങ്ങിയ ആളിലാണ് വൈറസ് കണ്ടെത്തിയത്. ഇ‍യാള്‍ സഞ്ചരിച്ച ബസിലെ ഡ്രൈവറും 18 യാത്രക്കാരും നിരീക്ഷത്തിലാണ്. 20 ലക്ഷം ജനസംഖ്യയുള്ള ഗോമയില്‍ ഇതു പടരുകയാണെങ്കില്‍ വന്‍ ദുരന്തത്തിലായിരിക്കും കലാശിക്കുക. 2014-16 ല്‍ പടിഞ്ഞാറന്‍ ആഫ്രിക്കയില്‍ എബോള വൈറസ് ബാധ മൂലം 11,300 പേര്‍ മരിച്ചിരുന്നു. കഴിഞ്ഞ ഒരു വര്‍ഷത്തിനിടെ കോംഗോയില്‍ മാത്രം ആയിരത്തിലധികം പേര്‍ മരിച്ചത്. 1976-ല്‍ സുഡാനിലും കോംഗോയിലുമാണ് എബോള രോഗം ആദ്യമായി കാണപ്പെട്ടത്.
