600 കിലോമീറ്റര് വേഗതയില് ഓടാന് സാധിക്കുന്ന ബുള്ളറ്റ് ട്രെയിനുമായി ചൈന
മണിക്കൂറില് 600 കിലോമീറ്റര് വേഗതയില് ഓടാന് സാധിക്കുന്ന പുതിയ ബുള്ളറ്റ് ട്രെയിനുമായി ചൈന എത്തുന്നു. പുതിയ ട്രെയിന് എത്തിയാല് ബീജിംഗില് നിന്നും ഷാന്ഗായില് എത്താന് വെറും രണ്ട് മണിക്കൂര് മതിയാകും. ചൈനയിലെ സിആര്ആര്സി കോര്പറേഷന് ലിമിറ്റഡാണ് ഇത്രയും വേഗതയുള്ള മാഗ്നറ്റിക് ലെവിറ്റേഷന് ട്രെയിനുകളെക്കുറിച്ച് ഗവേഷണം നടത്താനും അവ വികസിപ്പിക്കാനുമൊരുങ്ങുന്നത്. ചൈനയുടെ റെയില്വേ സിസ്റ്റം ഇക്കഴിഞ്ഞ വര്ഷങ്ങളിലായി വന്പന് കുതിച്ച് ചാട്ടമാണ് നടത്തുന്നത്. ഇതിലൂടെ ഇത് ലോകത്തിലെ ഏറ്റവും നീളമേറിയ ഹൈസ്പീഡ് റെയില് നെറ്റ് വര്ക്കായി മാറുകയും ചെയ്തിട്ടുണ്ട്. ലോകത്തുള്ള മറ്റേത് ട്രെയിനുകളെക്കാളും വേഗതയുള്ളവയായിരിക്കുമിവയെന്നതാണ് പ്രത്യേകത.
നിലവില് ജപ്പാനിലാണ് ഏറ്റവും വേഗതയുള്ള മാഗ്ലെവ് ട്രെയിനുള്ളത്. ഇതിന് മണിക്കൂറില് 603 കിലോമീറ്റര് സഞ്ചരിക്കാനാവും. എന്നാല് തങ്ങള് വികസിപ്പിക്കുന്ന പുതിയ ട്രെയിനിന് നിലവിലുള്ള ഏത് മാഗ്ലെവ് ട്രെയിനിനേക്കാളും വേഗതയുണ്ടാകുമെന്നാണ് ചൈനീസ് മാദ്ധ്യങ്ങള് അവകാശപ്പെടുന്നത്. ഈ ട്രെയിനില് കയറിയാല് ലണ്ടനില് നിന്നും പാരീസിലേക്ക് വെറും 34 മിനുറ്റുകള് മതിയാകുമെന്നും റിപ്പോര്ട്ടുണ്ട്.