കനത്ത മഴയിൽ വീട് തകർന്നു

തിക്കോടി: കനത്ത മഴയിൽ വീട് തകർന്നു. പള്ളിക്കര നൈവരാണിക്കൽ അവിൽ കണ്ടത്തിൽ സത്യൻ്റെ വീട് കനത്ത മഴയിൽ തകർന്നു. കഴുക്കോൽ തകർന്നു വീണ് ഓടുകൾ മുഴുവൻ പൊട്ടി. ചുമരിൻ്റെ കല്ലുകൾ ഇളകി ത്തെറിച്ചതിനാൽ ജനാലയും വാതിലും അടർന്ന് വീണു. കഴിഞ്ഞ ദിവസം രാത്രി 11 മണിയോടെയാണ് അപകടം.

സത്യനും കുടുംബവും സന്ധ്യയ്ക്ക് കോട്ടപ്പള്ളിയിലെ ബന്ധുവീട്ടിൽ പോയതായിരുന്നു. വീട്ടുകാർ ഇല്ലാത്തതിനാൽ വലിയ അപകടമാണ് ഒഴിവായത്. തിക്കോടി പഞ്ചായത്ത് വൈസ് പ്രസിഡണ്ട് രാമചന്ദ്രൻ കുയ്യണ്ടി, പഞ്ചായത്ത് അംഗം പ്രമീല സത്യൻ, വില്ലേജ് അധികൃതർ എന്നിവർ സ്ഥലം സന്ദർശിച്ചു.