കണ്ണൂരില്‍ ലോറി ഡ്രൈവര്‍ കുത്തേറ്റു മരിച്ചു
കണ്ണൂരില്‍ ലോറി ഡ്രൈവര്‍ കുത്തേറ്റു മരിച്ചു. കണിച്ചാര്‍ സ്വദേശി ജിൻ്റോ (39) ആണ് മരിച്ചത്. കണ്ണൂര്‍ എസ്.പി ഓഫീസിനും ക്രൈംബ്രാഞ്ച് ഓഫീസിനും സമീപത്തു വെച്ചാണ് സംഭവം. നാഷണല്‍ പെര്‍മിറ്റ് ലോറിയുടെ ഡ്രൈവറായിരുന്നു കൊല്ലപ്പെട്ട ജിൻ്റോ.
പുലര്‍ച്ചെ മൂന്നു മണിയോടെയാണ് കൊലപാതകം നടന്നതെന്നാണ് വിവരം. മോഷണ ശ്രമമാണ് കൊലപാതകത്തില്‍ കലാശിച്ചതെന്നാണ് സൂചന. ആക്രമണത്തിൽ ജിൻ്റോയുടെ കാലിന് വെട്ടേറ്റിരുന്നു. തുടര്‍ന്ന് ഓടിയ ജിൻ്റോ റോഡില്‍ കുഴഞ്ഞു വീഴുകയായിരുന്നു. രണ്ടു പേരാണ് ആക്രമിച്ചതെന്നാണ് വിവരം. പ്രതികളില്‍ ഒരാളെ പൊലീസ് കസ്റ്റഡിയിലെടുത്തതായാണ് വിവരം.
