കൊയിലാണ്ടി നഗരസഭ ആരോഗ്യ ജാഗ്രത – വലിച്ചെറിയൽ മുക്ത കേരളം ജനകീയ ക്യാമ്പയിൻ
കൊയിലാണ്ടി നഗരസഭ വലിച്ചെറിയൽ മുക്ത കേരളം ക്യാമ്പയിന്റെ ഭാഗമായി നഗരസഭയിൽ കൗൺസിലർമാരുടെ പ്രത്യേക യോഗം ചേർന്നു. ജനകീയ പങ്കാളിത്തത്തോടെ ആരോഗ്യ ജാഗ്രത -2023 സംഘടിപ്പിക്കുന്നതിനാണ് ലക്ഷ്യമിടുന്നത്. അശാസ്ത്രീയമായ മാലിന്യ പരിപാലനം പകർച്ചവ്യാധി വ്യാപനത്തിനും ജലസ്രോതസ്സുകളുടെ മലിനീകരണത്തിനും കാരണമാകുന്നതിനാൽ മാലിന്യ സംസ്കരണ – ശുചീകരണ പ്രവർത്തനങ്ങളും കൊതുകുനിവാരണ പ്രവർത്തനങ്ങളും ഗാർഹികതലം, സ്ഥാപനതലം, പൊതുതലം ,എന്നിങ്ങനെ മൂന്ന് പ്രവർത്തന മേഖലകളായി തിരിച്ച് ജനകീയ പങ്കാളിത്തത്തോടുകൂടി പ്രവർത്തനം നടത്തുന്നതിന് തീരുമാനിച്ചു.
നഗരസഭയിലെ മുഴുവൻ വീടുകളിലും സ്ഥാപനങ്ങളിലും ജൈവമാലിന്യങ്ങൾ ഉറവിടത്തിൽ തന്നെ സംസ്കരിക്കുന്നുണ്ടോ എന്നും,അജൈവ പാഴ്വസ്തുക്കൾ ഹരിത സേനയ്ക്ക് കൈമാറുന്നുണ്ടോ എന്നും ഹരിത കർമ്മ സേനയെ നിയോഗിച്ച് സർവ്വേ നടത്തും. മാലിന്യങ്ങൾ ഉറവിടത്തിൽ തന്നെ സംസ്കരിക്കാത്തവരെ കണ്ടെത്തി കർശന നിയമനടപടികൾ സ്വീകരിക്കുന്നതിനും യോഗം തീരുമാനിച്ചു. വാർഡ് തലത്തിൽ ജനകീയ കമ്മിറ്റികൾ വിളിച്ചു ചേർത്ത് വിവിധങ്ങളായ പ്രവർത്തനങ്ങളായ ഗൃഹ ശുചീകരണം, പൊതുസ്ഥല ശുചീകരണം, ജലസ്രോതസ്സുകളുടെ ശുചീകരണം, സ്ഥാപന ശുചീകരണം, വാർഡ് തല പൊതു ശുചീകരണം എന്നിവ നടത്തി ഓരോ വാർഡും വലിച്ചെറിയൽ മുക്ത വാർഡായി പ്രഖ്യാപിക്കുന്നതിനും മെയ് 25ന് നഗരസഭാതല വലിച്ചെറിയൽ മുക്ത നഗരസഭയായി പ്രഖ്യാപിക്കുന്നതിനും യോഗം തീരുമാനിച്ചു.
യോഗത്തിൽ നഗരസഭ ചെയർപേഴ്സൺ ശ്രീമതി സുധ കെ പി അധ്യക്ഷത വഹിച്ച് സംസാരിച്ചു. നഗരസഭ വൈസ് ചെയർമാൻ അഡ്വ.കെ സത്യൻ ,പൊതുമരാമത്ത് കമ്മിറ്റി ചെയർപേഴ്സ് ചെയർമാൻ ശ്രീ അജിത്ത് മാസ്റ്റർ ,ഹെൽത്ത് സ്റ്റാൻഡിങ് കമ്മിറ്റി ചെയർപേഴ്സൺ പ്രജില സി, വിദ്യാഭ്യാസ കമ്മിറ്റി ചെയർപേഴ്സൺ നിജില പറവക്കൊടി കൗൺസിലർമാർ, എന്നിവർ സംസാരിച്ചു .നഗരസഭ ക്ലീൻ സിറ്റി മാനേജർ ഇ. ബാബു പദ്ധതി വിശദീകരിച്ചു.നഗരസഭ സെക്രട്ടറി ഇൻ ചാർജ് കെ കെ ബീന സ്വാഗതം പറഞ്ഞു.
