ഡല്‍ഹിയെ ഇളക്കി മറിച്ച്‌ കൂറ്റന്‍ കര്‍ഷക റാലി
ഡല്‍ഹി: നരേന്ദ്ര മോദി സര്‍ക്കാരിന്‍റെ ജനദ്രോഹ നയങ്ങള്‍ക്കും ഏകാധിപത്യ പ്രവണതള്‍ക്കുമെതിരേ രാജ്യത്തെ കര്‍ഷകരും കര്‍ഷക തൊഴിലാളികളും ട്രേഡ് യൂണിയനുകളും അണിനിരന്ന റാലിയോടെ രാജ്യവ്യാപക പ്രതിഷേധങ്ങള്‍ക്ക് ഡല്‍ഹിയില്‍ തുടക്കമായി. രാജ്യത്തിന്‍റെ വിവിധ ഭാഗങ്ങളില്‍നിന്നായി എത്തിച്ചേര്‍ന്ന കര്‍ഷകരും തൊഴിലാളികളും മോദി സര്‍ക്കാരിനെതിരായ മുദ്രാവാക്യങ്ങളുമായി മഴയെ അവഗണിച്ചാണ് നടന്നു നീങ്ങിയത്.
“ഒന്നുകില്‍ നയംമാറ്റം അല്ലെങ്കില്‍ സര്‍ക്കാര്‍ മാറ്റം’ എന്ന മുദ്രാവാക്യം ഉയര്‍ത്തിയായിരുന്നു കിസാന്‍ മസ്ദൂര്‍ സംഘര്‍ഷ് റാലി. രാവിലെ എട്ടരയോടെയാണ് കിസാന്‍സഭയും സിഐടിയുവും കര്‍ഷകത്തൊഴിലാളി യൂണിയനും സംയുക്തമായി സംഘടിപ്പിച്ച റാലി രാംലീല മൈതാനത്ത് നിന്ന് പാര്‍ലമെന്‍റ് സ്ട്രീറ്റ് ലക്ഷ്യമാക്കി നീങ്ങിയത്. ബാങ്കിംഗ്, ഇന്‍ഷുറന്‍സ്, കേന്ദ്ര സംസ്ഥാന സര്‍ക്കാര്‍ ജീവനക്കാര്‍, സ്കൂള്‍ അധ്യാപകര്‍, തപാല്‍ ടെലികോം ജീവനക്കാര്‍ തുടങ്ങി വിവിധ സംഘടനകളും റാലിയില്‍ പങ്കെടുത്തു.
റാലിയുടെ ഒരറ്റം പാര്‍ലമെന്‍റ് സ്ട്രീറ്റില്‍ എത്തിയപ്പോഴും രാംലീല മൈതാനത്തു നിന്നുള്ള ജനപ്രവാഹം അവസാനിച്ചിരുന്നില്ല. കിസാന്‍സഭ ജനറല്‍ സെക്രട്ടറി ഹന്നന്‍ മൊള്ള, സിഐടിയു ജനറല്‍ സെക്രട്ടറി തപന്‍ സെന്‍ എന്നിവരാണ് റാലിക്ക് നേതൃത്വം നല്‍കി മുന്‍നിരയില്‍ നിന്നത്. രാവിലെ പത്തോടെ ആരംഭിച്ച യോഗത്തില്‍ കിസാന്‍സഭ, സിഐടിയു, കര്‍ഷക തൊഴിലാളി യൂണിയന്‍ നേതാക്കള്‍ സംസാരിച്ചു.
