കണ്ണൂരിലെ പ്ലൈവുഡ് ഫാക്ടറിയില്‍ വന്‍ തീപിടിത്തം
തളിപ്പറമ്പ്‌: കണ്ണൂരിലെ നാടുകാണിയില്‍ പ്ലൈവുഡ് ഫാക്ടറിയില്‍ വന്‍ തീപിടിത്തം. ഒരു കോടിയോളം രൂപയുടെ പ്രാഥമിക നഷ്ടം കണക്കാക്കുന്നു. തീയണയ്ക്കാനുള്ള ശ്രമം തുടരുകയാണ്. സംസ്ഥാന പാതയില്‍ നാടുകാണി പ്ലാന്റേഷന്‍ കോര്‍പറേഷന്‍ എസ്റ്റേറ്റിന് സമീപത്തു നിന്നും കൂവേരിയിലേക്കുള്ള റോഡില്‍ പ്രവര്‍ത്തിക്കുന്ന ചെട്ടിയാംകുന്നേല്‍ പ്ലൈവുഡ് ഫാക്ടറിയിലാണ് തീപിടിത്തം നടന്നത്.
ഇന്ന് പുലര്‍ച്ചെ രണ്ടരയോടെയാണ് സംഭവം. ഫാക്ടറിക്ക് പിറകിലെ ക്വാര്‍ട്ടേഴ്സില്‍ തൊഴിലാളികളായ നൂറോളം ബംഗാളികള്‍ താമസിക്കുന്നുണ്ട്. തീപടര്‍ന്നു പിടിച്ചതോടെ ഇവര്‍ ക്വാര്‍ട്ടേഴ്സില്‍ നിന്നിറങ്ങി ഓടുകയായിരുന്നു. സെക്യൂരിറ്റി ജീവനക്കാര്‍ വിവരമറിയിച്ചത് പ്രകാരം തളിപ്പറമ്പ്‌ അഗ്നിശമന നിലയത്തിലെ സ്റ്റേഷന്‍ ഓഫീസര്‍ പി.വി.പവിത്രന്റെ നേതൃത്വത്തില്‍ രണ്ട് യൂണിറ്റ് അഗ്നിശമനസേനാംഗങ്ങള്‍ സ്ഥലത്തെത്തി തീയണയ്ക്കാന്‍ ആരംഭിച്ചുവെങ്കിലും തീപടര്‍ന്നു പിടിച്ചതോടെ പയ്യന്നൂര്‍, കണ്ണൂര്‍ എന്നിവിടങ്ങളില്‍ നിന്നുള്ള രണ്ട് യൂണിറ്റുകളേക്കൂടി വിളിച്ചുവരുത്തി.
