രണ്ടു ഗഡു സാമൂഹ്യ ക്ഷേമ പെൻഷൻ ശനിയാഴ്ച മുതൽ വിതരണം ചെയ്യും; മന്ത്രി കെ എൻ ബാലഗോപാൽ
തിരുവനന്തപുരം: രണ്ടു ഗഡു സാമൂഹ്യ ക്ഷേമ പെൻഷൻ ശനിയാഴ്ച മുതൽ വിതരണം ആരംഭിക്കുമെന്ന് ധനമന്ത്രി കെ എൻ ബാലഗോപാൽ അറിയിച്ചു. 1650 കോടി രൂപ ഇതിനായി അനുവദിച്ചു. മെയ്‌ മാസത്തെ പെൻഷനൊപ്പം ഒരു ഗഡു കുടിശിക കൂടിയാണ്‌ വിതരണം ചെയ്യുന്നത്‌.
ഒരോ ഗുണഭോക്താവിനും 3,200 രൂപവീതം ലഭിക്കും. അഞ്ചു ഗഡുവാണ്‌ കുടിശിക ഉണ്ടായിരുന്നത്‌. അതിൽ രണ്ടു ഗഡു മാത്രമാണ്‌ ഇനി അവശേഷിക്കുന്നതെന്നും മന്ത്രി പറഞ്ഞു. 62 ലക്ഷത്തോളം പേർക്കാണ്‌ ക്ഷേമ പെൻഷൻ ലഭിക്കുന്നത്‌. ഏപ്രിലിലെ പെൻഷൻ വിഷുവിന്‌ മുന്നോടിയായി വിതരണം ചെയ്‌തിരുന്നു. കഴിഞ്ഞ വർഷം മാർച്ച് മുതൽ അതാത്‌ മാസം തന്നെ പെൻഷൻ വിതരണം ഉറപ്പാക്കിയിട്ടുണ്ട്‌.
