മോദി അഞ്ച് വര്ഷം കൊണ്ട് രാജ്യത്തെ നശിപ്പിച്ചു; മമത ബാനര്ജി
കൊല്ക്കത്ത: പ്രധാനമന്ത്രി നരേന്ദ്രമോദി കഴിഞ്ഞ അഞ്ചുവര്ഷം കൊണ്ട് രാജ്യത്തെ നശിപ്പിച്ചുവെന്ന് പശ്ചിമ ബംഗാള് മുഖ്യമന്ത്രി മമത ബാനര്ജി. മോദിയെ പുറത്താക്കി രാജ്യത്തെ സംരക്ഷിക്കണമെന്നും മമത ആഹ്വാനം ചെയ്തു. ആജ് തക് ടെലിവിഷന് ചാനലിന് നല്കിയ അഭിമുഖത്തില് സംസാരിക്കുകയായിരുന്നു മമത.
തെരഞ്ഞെടുപ്പിനിടെ ബംഗാളില് മമത അക്രമം പ്രോത്സാഹിപ്പിക്കുന്നു എന്ന ആരോപണം ഉയരുന്നു എന്ന് ചോദിച്ചപ്പോള് ‘തെരഞ്ഞെടുപ്പ് സംഘടിപ്പിക്കുന്നത് തെരഞ്ഞെടുപ്പ് കമ്മീഷനാണ് അല്ലാതെ ഞാനല്ല. ബിജെപി അവിടെ യാതൊരു വിധ തയ്യാറെടുപ്പുകളും നടത്തിയിട്ടില്ല. ഞാന് ഓരു തരത്തിലുള്ള കലാപവും സൃഷ്ടിക്കുന്നില്ല. ബംഗാളില് നിരവധി ബൂത്തുകളും ബ്ലോക്കുകളും ഉണ്ട്. അവിടെ പോയി ബിജെപി അത്തരത്തില് പ്രവര്ത്തിക്കുകയാണെങ്കില് അതിന്റെ ഉത്തരവാദിത്തം അവര്ക്ക് മാത്രമാണ്’ എന്നായിരുന്നു മമത പറഞ്ഞത്. പശ്ചിമ ബംഗാളില് യാതൊരു വിധ കലാപങ്ങളും ഇല്ലെന്നും മമത ബാനര്ജി കൂട്ടിച്ചേര്ത്തു.
രാജ്യം സുരക്ഷിതമായി കാണാനാണ് താന് ആഗ്രഹിക്കുന്നത്. എന്നാല് മോദിയുടെ കയ്യില് രാജ്യം സുരക്ഷിതമല്ല. മോദി രാജ്യത്തിന്റെ സ്വാതന്ത്ര്യത്തെ നഷ്ടപ്പെടുത്തിയെന്നും മമത പറഞ്ഞു. ബിജെപി 2019 ലോക്സഭാ തെരഞ്ഞെടുപ്പില് വലിയ തിരിച്ചടി നേരിടുമെന്നും ബംഗാളില് ഒരു സീറ്റ് പോലും ലഭിക്കില്ലെന്നും മമത കൂട്ടിച്ചേര്ത്തു.
താന് ജനാധിപത്യത്തെകുറിച്ച് സംസാരിക്കുമ്ബോള് മോദി വളരെ മോശം പദപ്രയോഗമാണ് നടത്തുന്നതെന്നും മമത ആരോപിച്ചു. തൃണമൂല് കോണ്ഗ്രസ് ഇതുവരെ ഹിന്ദു – മുസ്ലീം രാഷ്ട്രീയം കളിച്ചിട്ടില്ല. എല്ലാവരും നമ്മുടെ മതവും ജാതിയുമാണ്. തങ്ങള് വിശ്വസിക്കുന്നത് ജയ് ശ്രീറാമിലല്ല ജയ്ഹിന്ദിലാണെന്നും മമത പറഞ്ഞു.