മിഷേല്‍ ഒബാമ എഴുതിയ ഓര്‍മ്മക്കുറിപ്പുകള്‍ പുസ്തക രൂപത്തില്‍ നവംബര്‍ 13ന് പ്രസിദ്ധീകരിക്കും
വാഷിംഗ്ടണ്‍: മുന്‍ യുഎസ് പ്രസിഡന്‍റ് ബറാക് ഒബാമയുടെ പത്നി മിഷേല്‍ ഒബാമയുടെ എഴുതിയ ഓര്‍മ്മക്കുറിപ്പുകള്‍ പുസ്തക രൂപത്തില്‍ നവംബര്‍ 13ന് പ്രസിദ്ധീകരിക്കും. “ബികമ്മിംഗ്’ എന്ന പേരില്‍ ലോക വ്യാപകമായി പുറത്തിറങ്ങുന്ന പുസ്തകത്തില്‍ ഷിക്കാഗോയിലെ കുട്ടിക്കാലം മുതല്‍ വൈറ്റ് ഹൗസിലെ ജീവിതം വരെയുള്ള കാര്യങ്ങളാണ് മിഷേല്‍ പങ്കുവയ്ക്കുന്നത്.
ഡിജിറ്റല്‍, ഓഡിയോ പതിപ്പുകളായും പുറത്തിറക്കുന്ന പുസ്തകത്തിന്‍റെ പ്രസാധകര്‍ പെന്‍ഗ്വിന്‍ റാന്‍ഡം ഹൗസാണ്. ഒബാമയുടെയും മിഷേലിന്‍റെയും ഓര്‍മ്മകള്‍ പുസ്തക രൂപത്തില്‍ പ്രസിദ്ധീകരിക്കാനുള്ള അവകാശം 434 കോടി രൂപയ്ക്കാണ് പെന്‍ഗ്വിന്‍ നേടിയെടുത്തത്. ഇംഗ്ലീഷ്, സ്വീഡിഷ്, അറബിക് അടക്കം 24 ഭാഷകളില്‍ പുറത്തിറക്കും. യുഎസിലും കാനഡയിലും പെന്‍ഗ്വിന്‍ റാന്‍ഡം ഹൗസിന്‍റെ ഭാഗമായ ക്രൗണ്‍ പബ്ലിഷിംഗ് ഗ്രൂപ്പാണ് പുസ്തകം പുറത്തിറക്കുക.
1963-69 കാലഘട്ടത്തില്‍ പ്രസിഡന്‍റായിരുന്ന ലിന്‍ഡന്‍.ബി.ജോണ്‍സന്‍റെ ഭാര്യ ലേഡി ബേര്‍ഡ് ടെയ്ലറാണ് അമേരിക്കന്‍ പ്രഥമ വനിതകളുടെ ഓര്‍മ്മക്കുറിപ്പുകള്‍ പ്രസിദ്ധീകരിക്കുന്ന രീതിക്ക് തുടക്കമിട്ടത്. ബില്‍ ക്ലിന്‍റണിന്‍റെ ഭാര്യ ഹില്ലര്‍ ക്ലിന്‍റണ്‍(ലിവിംഗ് ഹിസ്റ്ററി), ജോര്‍ജ് .ഡബ്ല്യു.ബുഷിന്‍റെ ഭാര്യ ലോറി ബുഷ്(സ്പോക്കണ്‍ ഫ്രെം ദ ഹേര്‍ട്ട്) എന്നിവരും ഓര്‍മ്മക്കുറിപ്പുകള്‍ പ്രസിദ്ധീകരിച്ചിരുന്നു.
