ഭരണഘടനയെ ലംഘിക്കാന്‍ ആചാരങ്ങള്‍ക്കാവില്ലെന്ന് ബാലചന്ദ്രന്‍ ചുള്ളിക്കാട്
തൃശൂര്‍: ഭരണഘടനയെ ലംഘിക്കാനോ വെല്ലുവിളിക്കാനോ ആചാരങ്ങള്‍ക്കും വിശ്വാസങ്ങള്‍ക്കും ആവില്ലെന്ന് ബാലചന്ദ്രന്‍ ചുള്ളിക്കാട്. പ്രളയത്തില്‍ വീടു തകര്‍ന്നും മറ്റു നാശങ്ങളുണ്ടായും കഷ്ടപ്പെടുന്ന വിദ്യാര്‍ഥികളെ സഹായിക്കാന്‍ കേരളവര്‍മ കോളജ് സംഘടിപ്പിച്ച ചിത്രത്തോണിയുടെ സമാപന സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു ചുള്ളിക്കാട്. മനുഷ്യരെ ഒരുമിച്ചു ജീവിക്കാന്‍ പ്രേരിപ്പിക്കുന്നതാണ് ഭരണഘടന. പ്രളയത്തില്‍ രക്ഷപ്രവര്‍ത്തനം നടത്തിയ ചെറുപ്പക്കാര്‍ ജാതി മത ലിംഗ വര്‍ഗ ഭേദം നോക്കാതെ മഹത്തായ ദൗത്യമാണ് നിര്‍വഹിച്ചത്. ജാതി മത ഭിന്നിപ്പുണ്ടാക്കി രാഷ്ട്രീയ മുതലെടുപ്പ് നടത്താന്‍ ശ്രമിക്കുന്നവര്‍ അതോര്‍ക്കണം. ചുള്ളിക്കാട് പറഞ്ഞു. പ്രിന്‍സിപ്പല്‍ ഡോ.കെ. കൃഷ്ണകുമാരി അദ്ധ്യക്ഷയായി.
ചിത്രകാരി എന്‍.ബി. ലതാദേവി, മൈന്‍ഡ് സ്കേപ് പ്രസിഡന്‍റ് ഡോ.എന്‍.ആര്‍. ഗ്രാമ പ്രകാശ്, ദീപ നിശാന്ത്, ഡോ. പി.കെ.
രാജേന്ദ്രന്‍, പൂര്‍വവിദ്യാര്‍ഥി നേതാക്കളായ കെ.ആര്‍. ബീന, പുഷ്പാംഗദന്‍, യൂണിയന്‍ സെക്രട്ടറി സൗരവ് രാജ് എന്നിവര്‍ സംസാരിച്ചു. ചിത്രകലാ കൂട്ടായ്മയായ ‘മൈന്‍ഡ് സ്കേപ്പ്’, പൂര്‍വ വിദ്യാര്‍ത്ഥി സംഘടന ‘പള്‍സ് 80’, ഗുരുവായൂര്‍ മ്യൂറല്‍ കോളജ് എന്നിവരുടെ സഹായത്തോടെ നടത്തിയ ചിത്രകലാ ക്യാന്പിലെ ചിത്രങ്ങള്‍ വിറ്റ് രണ്ടര ലക്ഷത്തോളം വരുമാനമുണ്ടായി. ഇത് കുട്ടികളെ സഹായിക്കാന്‍ വിനിയോഗിക്കും.
160 കുട്ടികളെയാണ് സഹായിക്കേണ്ടത്. ഇക്കാര്യത്തില് സഹകരിക്കാന് താല്പര്യമുള്ളവര്ക്ക് പ്രിന്‍സിപ്പല്‍ ഡോ.കെ. കൃഷ്ണകുമാരിയെ ബന്ധപ്പെടാം.
