ഭര്‍ത്താവിനൊപ്പം വീട്ടില്‍ താമസിക്കാന്‍ യുവതിയുടെ കുത്തിയിരിപ്പ് സമരം
മാവേലിക്കര: ഭര്‍ത്താവിനൊപ്പം വീട്ടില്‍ താമസിക്കണമെന്ന ആവശ്യവുമായി യുവതി ആറു മണിക്കൂറിലേറെ വീട്ടുപടിക്കല്‍ കുത്തിയിരുന്നു. ഒരു വര്‍ഷം മുമ്പ്‌ പ്രണയിച്ച്‌ വിവാഹം കഴിച്ച കുറത്തികാട് സ്വദേശിയായ യുവാവിന്റെ വീടിനു മുന്‍പിലാണ് സമീപവാസി കൂടിയായ ഭാര്യ വീട്ടിനുള്ളില്‍ പ്രവേശിപ്പിക്കണമെന്ന ആവശ്യവുമായി കുത്തിയിരുന്നത്.
വിവാഹം കഴിഞ്ഞ് ഭര്‍ത്താവും കുടുംബവും തന്നെ ഉപദ്രവിക്കുന്നതായി കാണിച്ച്‌ യുവതി കുറത്തികാട് പോലീസില്‍ പരാതി നല്‍കിയിരുന്നു.പലതവണ പോലീസ് പ്രശ്നങ്ങള്‍ പരിഹരിച്ച്‌ ഇരുവരെയും രമ്യതയില്‍ എത്തിക്കാന്‍ ശ്രമിച്ചെങ്കിലും യുവാവ് യുവതിക്കൊപ്പം ഒന്നിച്ച്‌ പോകാന്‍ തയാറായില്ല. ഗാര്‍ഹികപീഡന നിയമപ്രകാരം പോലീസ് കേസ് എടുക്കുമെന്ന ഘട്ടത്തില്‍ എത്തിയതോടെ 15 ദിവസം മുമ്പ്‌ യുവാവ് കുറത്തികാട് പോലീസ് സ്റ്റേഷനിലെത്തി യുവതിയെ സ്വീകരിക്കാമെന്നും തന്റെ പേരിലുള്ള പരാതികള്‍ പിന്‍വലിക്കണമെന്നും ആവശ്യപ്പെട്ടു.
തൊട്ടടുത്ത ദിവസം തന്നെ യുവാവിനെതിരേ നല്‍കിയ പരാതികള്‍ യുവതി പിന്‍വലിച്ചു. യുവതിയെ ഒരാഴ്ചയ്ക്കുള്ളില്‍ വാടകവീട്ടില്‍ താമസിപ്പിച്ചു കൊള്ളാമെന്ന് യുവാവും എഴുതി നല്‍കി. ഒരാഴ്ച കഴിഞ്ഞിട്ടും വിളിക്കാതായതിനെ തുടര്‍ന്ന് കഴിഞ്ഞ ദിവസം യുവതി ഫോണില്‍ വിളിച്ചപ്പോള്‍ സ്വീകരിക്കാന്‍ തയാറല്ലെന്ന് കാട്ടി യുവാവ് അസഭ്യം പറഞ്ഞു. ഇതിനാലാണ് ഇന്നലെ രാവിലെ എട്ടു മണിയോടെ യുവാവിന്റെ വീട്ടുപടിക്കലെത്തി യുവതി കുത്തിയിരുന്നത്. ഉച്ചയ്ക്ക് രണ്ടുമണിയോടെ പോലീസ് എത്തി യുവാവ് സ്ഥലത്തില്ലെന്നറിയിച്ച്‌ വീട്ടിലേക്ക് അയച്ചു.
